L’anunciu del regresu de la saga Tony Hawk’s Pro Skater, con un remake de les dos primeres entregues que sal esti setiembre, tornó a l’actualidá una de les franquicies de videoxuegos más queríes de principios de los 2000. Sicasí, lo de THPS ye más qu’otru casu de señaldá millennial: cuando miramos a esos primeros xuegos, falamos de títulos consideraos, inda anguaño, ente los meyores de tola hestoria d’esti mediu, un honor que nun suel tar al algame de xuegos deportivos nin basaos en llicencies oficiales.
Foi un fenómenu cultural cuasique únicu. Apostando por retratar con una fidelidá inusitada -los deportistes, los patrocinadores, la música, les llocalizaciones…- un mundu tan específicu y desconocíu pal gran públicu, la desarrolladora Neversoft dio con un amiestu perfectu de presentación y xugabilidá que nun solo treslladó con ésitu a les consoles tol atractivu d’un deporte ‘estremu’, sinon qu’al empar contribuyó a la popularidá xorreciente del skate ente toa una xeneración.
Zelda, Mario, GTA, Tony Hawk. Pue paecer desaxerao, pero si atendemos al ranking de Metacritic, l’olimpu hestóricu del videoxuegu escríbese asina. Entós, ¿qué pasó pa que güei teamos falando d’esta franquicia como una alcordanza señaldosa? Vamos analizar les causes que llevaron a THPS del olimpu del videoxuegu a años de decadencia y escaezu pa ver cómo albidramos la so resurreició.
Reddit)
Matando la pita de los güevos d’oru
Sacar un xuegu al añu nun ye sostenible si se quier siguir ofreciendo un productu de calidá y innovador abondo pa caltener l’interés del públicu. Por eso nun hai prácticamente nenguna franquicia de xuegos que tenga resistío a esa dinámica. Activision, editora de THPS y propietaria de Neversoft, nun supo o nun quixo cuidar lo que tenía ente manes: de 1999 a 2007 espublizáronse hasta nueve entregues ensin faltar a una sola campaña navidiega.
En realidá lo increyible ye cuánto aguantó l’emburrión esta saga y el so equipu de desarolladores. Depués de cuatro ediciones aclamaes por públicu y crítica, incluyendo’l saltu xeneracional de PlayStation a PlayStation 2 y coetánees -y hasta unes versiones bien dignes pa Game Boy Advance-, Neversoft foi quien a reinventar la serie xusto a tiempu, y en tiempu récor. Asina, en Tony Hawk’s Underground (2003), al patinaxe gamberru y adictivu de los xuegos anteriores se-y amestaben elementos narrativos y d’esploración que foron bien recibíos y hasta comparaos con Grand Theft Auto.
D’ehí p’alantre, dando señales la saga de tar yá escosa d’idees, acumulábase’l desgaste en ventes y reseñes, sumiéndose na irrelevancia pa cuando llegó la siguiente xeneración de consoles ente 2005 y 2007. Sicasí, la hestoria de THPS nun diba quedar ehí: con Activision pel mediu, antes qu’un entierru dignu diba venir l’arrastre pelos suelos.
Guitar killed the skateboarding star
¿Quién s’alcuerda de Guitar Hero? En 2006, en plenu espoxigue d’esti innovador simulador de guitarra, Activision mercó los derechos sobre la marca, pero quedó ensin l’equipu creativu orixinal, que marchó a facer Rock Band con MTV. D’esta manera, la multinacional necesitaba un nuevu desarrollador pa Guitar Hero y decidió que fuere Neversoft: l’estudiu responsable de tola serie principal de Tony Hawk’s Pro Skater abandonaba asina la so escarnizada creación.
¿Qué futuru-y esperaba entós a la saga? Pos precisamente, si tolos nenos taben encantaos tocando guitarres de xuguete, Activision entendió que nun habia meyor manera de reinventar THPS que mangar a la xente enriba d’un monopatín de plásticu con control por movimientos. Y como eso había de ser abondo pa vender, nun importaba que’l desarrollu pasare a manos de Robomodo, un equipu recién fundáu y ensin esperiencia con esti tipu de xuegu.
El resultáu: Tony Hawk: Ride (2009) y la so secuela Shred (2010), fracasos estrepitosos como esperiencia de xuegu y como propuesta comercial, que nun foron quien a vender copies nin rebaxaes a preciu de saldu. En menos d’una década, los xuegos del Birdman pasaren de facer hestoria a ser otru exemplu más de sobreesplotación comercial.
Desfaciendo y refaciendo
De la gloria a la mediocridá y d’ehí a la ocurrencia, queda un capítulu por cuntar: el d’un regresu llaceriosu que sema les mayores duldes sobre un posible futuru pa la saga. Si el momentu actual pue paecer afechiscu pa intentar revivir un xuegu tan queríu pol públicu, de xuru que 2012 y 2015 nun lo yeren. Namás hubieron de pasar dos años del patín de xuguete pa que Activision volviere a la carga con una pretendida vuelta a los oríxenes.
A estes altures THPS yera una franquicia quemada, más muerta que viva, pero la multinacional tenía priesa por intentar el comeback, porque nun yera concebible tener esa marca nel porfoliu y nun la rentabilizar. Hai que dicir que tamién ye cuestionable’l papel del propiu Tony Hawk: siempre afalagáu pola so participación activa nos meyores tiempos de la franquicia, lo cierto ye que nunca dexó de ser artífice y voceru d’unos xuegos cada vez más probetayos.
Intentáronlo dos veces más, dambes nuevamente de la mano de Robomodo. Tony Hawk’s Pro Skater 5 (2015) ye la más reciente y el momentu nel que la serie tocó fondu. El títulu, depués de 13 años de la última entrega numberada, yera una aparente declaración d’intenciones que nun fixo más que preparar el terrenu pa la desesperación de los fans que pudieren quedar. Esti xuegu, sacáu a les carreres por custiones contractuales, nun ye namás que fuere malu: ye que yera un despropósitu y taba ensin acabar. Y asina foi como THPS pasó de ser el xuegu meyor valoráu de PS2 a ún de los diez peores de PS4, y Robomodo a la lliquidación.
Pero si esi episodiu hasta agora final pue ser el más murniu, paga la pena reparar un momentu nel inmediatamente anterior, porque ye’l que pon n’entredichu la propia proposición qu’anguaño nos trai Activision. Y ye qu’en 2012 asoleyaba Tony Hawk’s Pro Skater HD, una colección de dellos niveles de los dos primeros xuegos de la serie refechos pa PS3 y Xbox 360. Sí, efectivamente, va ocho años sacaron al mercáu esactamente’l mesmu conceptu que tán presentando agora.
Con un personal incapaz y baxu presupuestu, aquel títulu, más refritu que remake, pasó ensin pena nin gloria. La esbilla de niveles y conteníos yera probe, la execución nun acababa de concasar colo que fexo grandes a los xuegos orixinales y l’apartáu gráficu nun yera lo esperao. L’apueste a priori más seguru tampoco valía pa recuperar una migaya d’entusiasmu, nun digamos de relevancia nin de credibilidá. Paecía que lo de THPS nun tenía remediu.
¿Habrá (otra) manera?
Nun hai un Tony Hawk curiosu dende hai 15 años y yá s’intentó facer un remake del que naide s’alcuerda. ¿Entós, por qué díbemos enfotanos en qu’esta vuelta salga bien? A pesar de too, razones pa la esperanza hailes. La primera ye una cuestión de sensaciones. La campaña de marketing y les primeres imáxenes que tamos viendo d’esti Tony Hawk’s Pro Skater 1+2 aparenten un esfuerciu claru, creativu y económicu, por redimir a la franquicia y sacar un productu a l’altor de les espectatives.
De momentu, sabemos que los conteníos cumplen: por poner un casu, a diferencia del remake anterior, agora va caltenese cuasi tola banda sonora orixinal, un aspectu abegosu por mor de los derechos d’autor, pero indisociable de la esperiencia de xugar a THPS y prioritariu dafechu pa los siguidores.
Y sobremanera, l’activu principal d’esti proyectu ye l’estudiu que ta detrás. Vicarious Visions vien de sacar alantre un encargu asemeyáu, el de los remakes de la triloxía Crash Bandicoot y Crash Team Racing: otra serie escaecida y d’altu poder señaldosu que funcionó perbién nel so regresu. Amás, la compañía yá tuvo involucrada con THPS nel so momentu, desarrollando ports y adaptaciones de delles de les entregues clásiques. L’estudiu promete que va recrear y modernizar a partes iguales la esperiencia orixinal, asegurando por exemplu que los xugadores de vieyo van poder xugar de memoria gracies a la fidelidá de los niveles y movimientos.
¿Rellanzamientu o oportunidá puntual?
Siendo xuegos bien diferentes, la comparanza con Crash ye interesante pa enfocar el futuru. El ruxerrux ye que l’ésitu de los remakes del marsupial naranxa va llevar a la producción d’una entrega nueva dafechu. ¿Pue tener THPS un futuru interesante más allá d’esti 1+2 y, presumiblemente, un 3+4? La trayectoria de la franquicia y el fechu de que la promesa d’esti remake tea basada nuna recreación milimétrica del pasáu nun son el meyor presaxu.
Por munches males decisiones a les que se puea achacar la decadencia de THPS, ye probable qu’esta serie nunca fuere a durar pa siempre na cresta la fola. Yá nun se va repetir la conxunción de factores que la fexo espoxigar va dos décades: dende l’equipu creativu implicáu al puntu d’evolución de la industria del videoxuegu, pasando pel propiu públicu y hasta pel momentu nel zeitgeist de la cultura del skate.
Lo que llega en setiembre pue ser un revival prestosu pa quienes esfrutemos colos orixinales, una oportunidá pa face-yos xusticia con un espectáculu visual de nueva xeneración y el potencial de dellos ameyoramientos como’l xuegu online. Pero ye fácil que descubramos tamién qu’estos xuegos son productu del so tiempu y que’l meyor escenariu ye que puedan volver a brillar fugazmente nestes condiciones específiques. Seya como fuere, a poco que salga bien, naide nos va quitar la sensación de volver encadenar aerials, flips, grinds, lips y los manuals del demoniu mientres suenen de fondu You o No Cigar. Y lo más importante: anque nun s’introduciere orixinalmente hasta’l tercer xuegu, sí, tamién hai revert.
