Yá tenemos falao en Refuelgu de Hogwarts Legacy, un ésitu talu qu’aceleró tolos proyeutos de la franquicia de Harry Potter tres d’un periodu nel que paecíen quedar en barbechu. De fechu, agora cuenten que se vendió un 256% más de lo que prevía, y nun ye tampoco que les predicciones fueren males.
Por embargu, una de les quexes de los xugadores yera que nel pasu del alumnu pel cursu de la escuela máxica ye imposible, cola sida de que zarraron el campu por un accidente, xugar a “quidditch”, el deporte máxicu por escelencia de la saga (y bien peculiar, porque los xugadores van montaos n’escoba). Ruxíase que taben guardándolo pa un DLC, y d’esa manera ganar unes perrines más nunos meses… La solución foi otra, y ye una que de xuru nun ye pa tolos gustos.
De sópitu, ensin que naide tuviera idea, anuncien Harry Potter: Quidditch Champions, un videoxuegu nuevu, desendolcáu por Unbroken Studios (los mesmos de Suicide Squad: Kill the Justice League) y pal qu’amás yá podemos apuntanos como playtesters (n’ordenador, Playstation 4 y 5, Xbox Series X y One y Nintendo Switch).
Con un estilu de gráficos más de dibuxos animaos que Hogwarts Legacy, y que puen recordar un poco a sagues como Fable, l’apaición repentina d’esti videoxuegu deportivu produz reaiciones de lo más diverses, sobre manera de quien ve la estrena como una manera d’encalcuzar nun xuegu nuevu lo que, por xusticia, habría poder facese nel acabante de salir.
Sicasí, la opinión ye de vueso, y dexámosvos equí l’enllaz cola primer güeyada al videoxuegu y l’anunciu p’apuntase como playtester.
