En 1997 estrenóse Gattaca, una película que, magar pasar bastante desapercibida, nun tardó a convertise nuna obra de cultu. Nella preséntennos un futuru nel que la humanidá se divide en dos clases: unos son los nacíos de manera natural, mientres que los otros tienen meyores xenes y forma física pola mor de la seleición euxenésica. Llegalmente nun hai diferencia ente ellos, pero los “inválidos” queden pa les xeres más míseres. Vincent (Ethan Hawke) ye ún d’estos inválidos, pero cuándo-y surde la posibilidá de facese pasar por un válidu (Jude Law) nun desaprovecha la oportunidá. Por embargu, y como nun podía ser d’otra manera, les coses complíquense-y, más cuando escomienza una rellación con una colega (Uma Thurman).
Asina, con una temática que nun ta pa nada pasada de moda, pos ye un futuru que tovía paez dable, resulta que Showtime ta tresnando una continuación, pola qu’amás ta apostando fuerte, poniendo una cantidá importante pa facela. Al mandu de la serie van tar Howard Gordon y Alex Gansa (co-creadores y productores de Homeland) y polo que cuenten va ser una continuación de la película, ambientándose delles décades dempués.
Showtime ta agora mesmo orientando los sos proyeutos al desendolcu de franquicies, como cola producción de delles ponderes de Dexter (cosa de la que yá vos falamos equí), conque nun sedría raro que tengan esperances puestes en crear una franquicia más con esti mundu distópicu.
Por si nun vistis la película orixinal y tenéis curiosidá, dexámosvos l’avance equí. Por supuestu, en cuantes qu’haya ún de la serie vamos ufrívoslu.
