L’AsturCON, la convención de fantasía asturiana de la que tamos informando los últimos díes, preséntase oficialmente nuna rueda de prensa na Llaboral Centru d’Arte y Creación Industrial.
Con un resume de les actividaes que nos esperen, la organización promete una xornada de meses redondes sobre dellos temes rellacionaos cola fantasía, la ciencia ficción y el rol, un puestu de venta, speed-dates ente editoriales y aspirantes a escritores con manuscritos non espublizaos, la esposición El mundu ye Viesca y el Premiu Fontenebrosa, que s’inaugura con un galardón “cero” pal autor de la triloxía de fantasía qu’inspira’l nome, Vicente García Oliva.
Ente los autores confirmaos alcuéntrense autores de renome como Pilar Sánchez Vicente, Rodolfo Martínez, Andrés Fernández o Yosune Álvarez, ente munchos otros. Les editoriales implicaes son Orpheus Ediciones Clandestinas, Radagast, Sportula, HT Publishers y Trabe. 
