Nun ye una analoxía gratuita, pos Rebel Moon ye, de fechu, un proyeutu que Zack Snyder presentó a Lucasfilm pa dirixir él una película de Star Wars. Quiciabes nun-yos gustó la idea, o más probablemente nun quixeron dar a la saga un toque tan propiu como’l de Zack Snyder, que llevanta pasiones tanto pa bien y como pa mal. El casu ye qu’al direutor sí que-y debía prestar una barbaridá la idea, porque más anchu que llargu decidió facer la película pola so cuenta, con espaes láser y too, pero quitando les referencies poles que lu podríen denunciar.
Asina ñació, en collaboración de nueves de Snyder con Netflix (como con Army of the Dead), lo que quier ser una saga nueva de space opera (yá ta fálándose d’una triloxía), na que la influyencia de Star Wars ye clara pero tamién les diferencies. Sofia Boutella (lo único que pagaba la pena de la película última de The Mummy) protagoniza esta película como Kora, una veterana d’un exércitu galácticu que busca reclutar en mundos cercanos al suyu un equipu variopintu col envís d’enfrentase a los exércitos d’un tal Rexente Balusarius, pos esti quier invadir la so colonia.
Ye bultable, polo que tenemos visto, que Snyder busca un públicu más adultu talamente como fizo coles películes de superhéroes, y l’avance qu’acaba salir (y que vos dexamos calcando equí) ta tremáu de les sos escenes tan propies, nes que busca la estética al empar que l’aición lo envuelve too (y, tamién, como ye vezu y si se nos permite dicilo, onde s’escede un poco cola cámara lenta).
La primer parte d’esta saga estrénase na canal productora est ventidós d’avientu, y cuenten que la segunda parte se rodó al empar y va salir a lo llargo de 2024.
