Nos años ochenta fízose famosa una productora, Troma Entertainment, por facer películes tan peculiares como estrambóliques. Yeren una especie de parodies gore de películes d’aición y horror, con pocu presupuestu pero davezu con un escesu de punquis y pechos al aire. Ente les obres más nomaes tán, por casu, Class of Nuke ‘Em High, Sgt. Kabukiman NYPD o Surf Nazis Must Die. Pero la qu’algamó sonadía mundial, con trés continuaciones, serie de dibuxos, cómics editaos por Marvel y llinia de moñecos, foi The Toxic Avenger (1984).
Nella, un conserxucu d’institutu, Melvin Ferd Junko III, sufre una broma pesada per parte de los alumnos, y esta acaba por somorguialu en residuos tóxicos. A partir d’ehí yá nun vuelve a ser el mesmu, sinón que se vuelve un monstruu con ínfules de superhéroe que combate a la gandaya con una fregona. Un argumentu alloriáu, y más tovía si vemos cuasi cualesquiera de les sos escenes (dexámosvos l’avance calcando equí, por si tenéis interés nello).
El casu ye qu’agora a daquién se-y ocurrió facer un remake de la hestoria, y de fechu, anque nun tenemos fecha d’estrena al públicu, yá van poder vela dalgunos privilexaos esti setiembre nel Fanstastic Fest (Texas). A paches ente Troma y Legendary, esta película paez contar con bastante más presupuestu que les orixinales, y ye por ello que puen contar con Peter Dinklage (Tyrion Lannister en Game of Thrones) pa facer del nuevu conserxe mutante, y tamién con otros actorazos como Kevin Bacon, Taylour Paige o Elijah Wood en papeles que tovía nun tenemos claros.
Y too esto venía a que por fin tenemos una imaxe de Dinklage como’l superhéroe, anque a dicir verdá nun enseña muncho. La cosa ta llevándose con un secretismu tremendu, y esto que vos ponemos darréu ye lo único que podemos ofrecevos de momentu. Sicasí, animámosvos a da-y zoom y fixavos nos detalles, porque hai unes cuantes cosuques llamaderes.