Va tiempu qu’en Marvel tiene un problema grave con Frank Castle. Dende que miembros del exércitu norteamericanu empezaron a usar, n’Irak y Afganistán, la mítica calavera como símbolu, esta ta convirtiéndose nun símbolu d’ultraderecha, llevaú con arguyu por supremacistes blancos en particular y trumpistes en xeneral. Y ye que’l mesmu Punisher foi nel pasáu, cuenta la so historia, un marine que yá quedara tocáu de l’ala na guerra (nun principiu en Vietnam, anguaño treslladáronlu al país ficticiu de Siancong), y los militares que combatieron n’Oriente Próximu debieron sentise identificaos.
Asina que, como en Marvel lleven dellos intentos d’iguar la cosa, y nun lo consiguen nin enfrentando’l personaxe a ultraderechistes nos propios cómics, nos últimos tiempos tán llevándolu per caminos nuevos, a ver qué tal resulten. El penúltimu, nel volume trece del personaxe (2022), con Jason Aaron de guionista y Jesús Saiz de dibuxante, foi convertilu nel cabezaleru de la secta ninja La Mano, cambiándo-y la calavera del pechu por otra distinta y les armes de fueu por katanes. Y agora paez qu’eso nun ye abondo, pos lo nuevo, salío ayeri mesmu nes llibreríes, ye que vence a Ares, Dios de la Guerra, y garra los sos poderes. Asina, Punisher agora ye ún de los personaxes más poderosos de Marvel.
Esta maniobra, en verdá recuerda a una de los años noventa que quier ser escaecida, cuando pa revilvar l’interés porl personaxe convirtiéronlu nun axente matademoños con poderes anxélicos. La cosa nun duró muncho naquella, pero queda por ver cómo de permanente ye esta situación nueva.
