Tán acabante d’anunciar que John Bernthal, l’actor que yá ficiera de Punisher na serie de Netflix Daredevil, va facer apaición tamién na continuación d’esta que ta preparando Marvel pa Disney +, Daredevil: Born Again, cosa que lu convertiría nel Punisher oficial del Universu Cinematográficu Marvel.
Anque ficiera la primer apaición na serie del héroe ciegu de Hell’s Kitchen, el personaxe llegara a contar con una serie propia de dos temporaes, y munchos considérenlu’l meyor Punisher n’imaxe real (siendo los otros trés Dolph Lundgren, Thomas Jane y Ray Stevenson). Y masque foi un notición qu’integraren les series de Netflix nel Universu Cinematográficu Marvel (lo que quedó demostrao cola apaición de Daredevil en Spider-Man: No Way Home), col cambiu de productora había duldes no tocante a que volviera a apaecer l’antihéroe de la calavera, yá que Marvel ta teniendo problemes serios dende que la ultraderecha noteamericana usa’l so logo como símbolu. Va poco contábamosvos les xerigonces que ta faciendo la editorial pa tentar d’arreglalo, y si nun vos enterastis podéis lleelo equí.
Sicasí, agora ta demostrada la vuelta del actor y del personaxe, anque tamién tenemos males noticies al respeutive de la serie: Deborah Ann Woll y Elden Henson, los que daben vida a Karen y Foggy, nun van volver a interpretar los sos personaxes, y queda por saber si van sustituyilos por otros o a cencielles nun van apaecer. De ser la segunda posibilidá, el guión de la serie nun va tener muncho que ver col de la saga de cómics que-y da nome, yá que nesta Karen volvióse heroinómana y, pa consiguir droga, viende la identidá secreta del héroe. Un argumentu que, amás, nun paez casar demasiao col tonu pa tolos públicos que-y presta a Disney.
La serie ta tovía en producción y espérase la estrena pa primavera de 2024.
