Como tengo comentao n’otres reseñes, amunchayá que nun se m’ocurre dir al cine pa ver películes de superhéroes, pos anque m’embruxilaba ver en pantalla los personaxes de los que tenía lleío na infancia, l’efectu foi esvaneciéndose según pasaben los años. Por embargu, dacuando sigo viendo nelles esos destellos del “sentíu de la maraviya”, conque, tarde o temprano, siempre veo o intento ver tolo que sal. De la “fase” anterior gustáronme Black Widow y Thor: Love & Thunder, y la serie de WandaVision paecióme’l trabayu meyor de Marvel desque empezaron a facer películes. Pero yá, nun salvaría más nada. Agora salía Ant-Man and the Wasp: Quantumania, la que sedría la tercer película d’Ant-Man, segunda de Wasp y primera de la Fase 5, y ye que la cosa nes películes de Marvel pincipia a complicase tanto como nos cómics.
La película nun gasta n’introducciones, preséntanos a los protagonistes de manera que yá habríemos conocelos de les películes anteriores y darréu métenos de nueves nel centru l’acción, que nesti casu consiste na esploración del “universu cuánticu” (lo que nos cómics ye’l microversu o universu soatómicu), un universu al que llegues si encueyes a menor tamañu que’l que tien un átomu, y que yá pudimos acolumbrar na película anterior. Y, cómo non, hai un malu mui malu gobernándolu, y los personaxes van tener de derrocalu.
La guapura y rareza de los paisaxes del universu son evidentes, y el toque que tien a la sicodelia de cómics clásicos, yá seya de Kirby o Ditko, resulta estelador. La variedá de creatures que lu pueblen ye quiciabes hasta demasiada, pero podemos perdenos un bon cachu nes sos traces, nos cielos afuracaos y nes cuestes imposibles. Ehí, un diez a los que diseñaron y “dibuxaron” el mundu cuánticu. Pol restu, la verdá que la película nun me dixo nada. Emociones d’epicidá vacía, chistes ensin gracia, quiciabes porque too sigue la mesma fórmula que tenemos visto milenta vegaes y nesti casu al serviciu de la presentación en cine (yá lu vimos en serie) de Kang, Inmortus, Rama-Tut o como se llame’l villanu cuando s’enfrente al próximu equipu de Vengadores, pos yá lleven un tiempu anunciando que va ser el nuevu Thanos. Lo que tamién, per otru llau, pue sali-yos regular, pos los últimos díes tán acumulándose les denuncies contra l’actor, Jonathan Majors, por violencia de xéneru, y yá ta ruxéndose que puen sustituyilu nel papel por otru actor. Ocúrreseme que podríen salvar los muebles si na próxima película sal como Iron Lad, una versión más moza del personaxe (coses de viaxar nel tiempu) y aprovechen asina pa cambialu por otru.
Pero toi esviándome. El casu ye que, por mui guapos que seyan munchos de los sos fotogrames, nun funciona como película, pa mio humilde idea. Pueque, anque la cosa ta poniéndose difícil, sí funcione como un engrane más del universu compartíu, supongo qu’eso dirálo’l tiempu. Pero ye un poco como cuando te dicen qu’una serie ameyora na tercer temporada, que nun apetez emplegar tantes hores en favor d’un horizonte que nun acabes d’acolumbrar. Como soi un poco obsesivu, sicasí, acabaré cayendo no próximo que salga. Pero más tarde que temprano.
