Por Victor Suárez
Ta a piques de rematar l’añu 2020 y dende Refuelgu queremos facer un homenaxe a eses sales y teatros onde los asturianos y asturianes s’averaben va 100 años a ver un pocu de bon cine. Y ye que cien años son munchos, pero munchos de los títulos d’aquella dómina van sonanos bien actuales porque lleven adaptándose década tres década, con mayor o menor fortuna.
La década de 1920 ye la del cine mudu y, anque pa un espectador non avezáu puedan resultar películes anticuaes y pocu atractives, munches d’estes obres tienen tresfondos bien actuales o representen momentos históricos, movimientos sociales, políticos y/o culturales, amás de por supuesto, les característiques cinematográfiques de la dómina.
Una d’eses característiques yera la proyección de películes en formatu serie y en distintes sesiones qu’afalaba a volver a la sala pa poder saber el desenllaz de la trama. Nestes, nun podíen faltar les aventures de personaxes tan conocíos como’l Charlot de Charles Chaplin que sirven de reclamu.
Dalgunes estrenes de les distintes sales fueron les que vienen darréu:
El Salón Doré: El Príncipe Rodolfo
Teatru Robledo: Charlot en la escuela,
Teatru Xovellanos: El Castillo de los Fantasmas, La máscara de los dientes blancos, El Fantasma Gris, Los Misterios de Nueva York.
Cine Versalles: Las aventuras de Catalina
Nesta primer entrega del artículu, vamos destacar tres de los títulos que más nos pueden interesar a los asturianos y asturianes cien años depués.
El Conde de Monte Cristo (1913)
Trátase de la primera de les adaptaciones cinematográfiques de la conocida obra d’Alexandre Dumas a la que tenemos accesu yá que la primera, rodada como esta en 1912, considérase una película perdida y, como podéis comprobar, llegó con ciertu retrasu a les sales asturianes. Esti títulu mudu dirixida por Joseph A. Golden y el pioneru Edwin S. Porter, avéranos a la escapada d’Edmond Dantès del calabozu del castiellu d’If y a la posterior venganza escontra los que yeren los sos amigos. Un personaxe que l’actor James O’Neill conocía bien porque yá lu interpretara sobre les tables más de 6000 veces a lo llargo de 40 años.
The Fatal Ring (1917)
Película serial d’acción de venti episodios protagonizada pola estrella de la dómina Violet Standish, más conocida col nomatu de Pearl White (Perlla blanca) y de la que vamos falar con mayor fondura nel futuru.
Como munches películes estauxunidenses d’aquellos años, The Fatal Ring, un socesu d’escenes d’acción que ponen a prueba la condición d’especialista de Pearl White, foi oxetu de recortes per parte de les distintes xuntes de censura cinematográfica polo que ye difícil atopar una copia completa.
Las aventuras de Dorotea (1908)
Película muda norteamericana de 1908, estrenada n’Asturies col títulu de Las Aventuras de Dorotea, dirixida por D. W. Griffith y con una duración de 12 minutos, foi la primer película de la bayurosa carrera de Griffith. Caltiense una copia de la película nel archivu de la Biblioteca del Congresu d’Estaos Xuníos y cuenta la hestoria d’una moza llamada Dollie, interpretada por Gladys Egan y qu’en siendo secuestrada por un vendedor ambulante xitanu, acaba atrapada nun barril mientres flota ríu abaxo escontra un remexón.
