Va unos díes facíase pública la fuxida del ex-rei, Xuan Carlos I, investigáu pola xusticia suiza y anguaño en paraderu desconocíu. L’ex-rei d’España decídese asina a marchar del país col envís – presumiblemente – de fuxir de la xusticia. Nos últimos díes bien de medios de comunicación contaben que nun yera una cosa tan rara na familia Borbón y que nun foron pocos los antepasaos del ex-rei Xuan Carlos I los qu’acabaron pasando al entamu o al final de les sos vides, pel exiliu.
Con too, ¿Qué hai de los demás países? ¿Ye l’exiliu norma o esceición? Neste artículu vamos facer un repasu d’otres families reinantes y presidentes que tán exiliaos de los sos respeutivos países. Hebo monarques exiliaos (como los d’Exiptu o Grecia) qu’acabaron volviendo a los sos países, sicasí, hailos que tovía nun pueden:
El Dalai Lama
Anque nun ye un monarca nel sentíu tradicional, el Dalai Lama nun dexa de tener carauterístiques propies d’ún. Más llider relixosu que d’estáu, el Dalai Lama supónse que ye’l soberanu del Tíbet – anguañu ocupáu por China. En 2011 renunció a tolos cargos políticos que-y correspondíen nel Gobiernu de Tíbet nel exiliu, anque remanez como cabezaleru espiritual de la comunidá relixosa del budismu tibetanu.
China invadió Tibet nel 1950, faciendo qu’esta monarquía feudal y teocrática acabare siendo una rexón autónoma de la República Popular China. Surde la dulda de qué puede pasar col cargu del Dalai Lama en morriendo l’actual cabezaleru. Pos ye difícil que China permita la cellebración de los rituales polos que s’escoyía a ún nuevu.
El Sha de Persia:
La revolución islámica o “Revolución de los Ayatolás”, acabó cola monarquía en Persia. Por acabar, acabó hasta col nome del país, qu’anguaño emplega’l d’Irán. Sicasí, el Sha de persia nun morrió nel incidente y pudo exiliase a los Estaos Xuníos. Anguaño, l’heriede del Sha que s’exilió, Reza Pahlavi, nun paez tener nenguna intención de renunciar a les sos pretensiones sobre’l tronu. Vive nos Estaos Xuníos a los que llegó colos padres depués de la Revolución Islámica.
A diferencia del casu tibetanu, nel Irán d’enantes de la Revolución nun había una dictadura feudal, sinón una monarquía parllamentaria con llibertaes y participación política. Por eso, amás de la propia casa real, exiliáronse tamién políticos y militantes lliberales, conservadors, socialistes y comunistes.
El rei de Zanzíbar
Zanzíbar foi otru de los países qu’abolió la monarquía. Nesti casu, la familia real de Zanzíbar acabó exiliándose a Reinu Xuníu (ún de los destinos que más trunfen ente los monarques). L’heriede, Sayyid Ali bin Jamshid Al Said, caltién la pretensión al tronu y hasta una páxina web de la monarquía de Zanzíbar na que se cuenta la historia d’esta institución.
El Presidente de Bolivia
Evo Morales nun ye un rei, anque sí un xefe d’estáu. El so casu foi ún de los que más sonadía tuvieron a lo último, pos tuvo que s’exiliar a México depués del golpe d’estáu que-y dieron. Nesti país alcuéntrase agora, pos foi nél onde recibió asilu internacional.
Nun tien la pretensión de volver a la presidencia – de la que dimitió – pero sí de lluchar escontra’l réxime que gobierna anguaño en Bolivia. Los detractores indiquen qu’Evo Morales saltárese delles lleis al querer reformar la constitución pa caltenese nel poder.
Primer ministru de Macedonia
Nikola Gruevski foi primer ministru de Macedonia de 2006 a 2016 y foi’l centru d’un gran escándalu de violación de llibertaes. Al paecer, acordies cola xusticia, munchos ciudadanos macedonios foron víctimes d’escuches illegales. Pa fuxir d’esti procesu penal, el llider de Macedonia refuxóse na Hungría d’Orban, un mandatariu conocíu poles sos posiciones lliberticides.
El Presidente de Gambia
Yahya Jammeh foi presidente de Gambia bien de tiempu; concretamente de 1996 a 2017. Sicasí, acabó nel exiliu tres de qu’una “Comisión de la Verdá” entamare la investigación de bien de crímenes que se-y atribuyen. La ONU medió pa que nun hubiere castigos escontra los países que lu sofitaren nel exiliu y marchó del país con aviones de carga nos que llevó vehículos de lluxu. Anguaño ta exiliáu na antigua colonia española de Guinea Ecuatorial.
El Presidente d’Ucraína
Viktor Yanukovich foi presidente d’Ucraína y dirixó un gobiernu pro-rusu. El mandatariu fuxó’l 21 de Febreru de 2014 ayudáu por fuercies especiales “Spetnaz” ruses. Al paecer, fixo tolo posible por disimular que taba fuxendo, pero foi noticia cuando los medios de comunicación informaron de que lu vieren en Moscú el 26 d’aquel mesmu mes.
El Presidente de Yemen
Yemen ye otru de los países más conflictivos nesta dómina. Bombardiáu por Arabia Saudí y metanes una guerra civil, Yemen ye un llugar inestable. El so presidente, Abdrabbuh Mansur Hadi, tuvo que fuxir. Anguaño pasa l’exiliu na monarquía absolutista y teocrática d’Arabia Saudí.
