¿Cómo víen en pasáu lo que diba pasar en 2023? ¿En qué obres tien protagonismu esti añu y cómo nos lo pintaben? Vamos facer un repasín peles películes, videoxuegos y demás obres de ficción a ver si paez creyible lo que contaben que nos espera…
Hai películes bastante nueves que paecen nun tar mui acordies a la realidá. Pela cueta de lo que cuenta the Purge: Anarchy (2013), nos EEXX nun van celebrar la sesta purga, esa nueche ta que tán permitíos cuasi tolos crímenes pa que la xente quede tranquilino hasta l’añu viniente. Los Vengadores tampoco nun tienen d’enfrentase a Thanos pa recuperar la metá de la población mundial (Avengers: Endgame, 2019) y por supuestu nun hai mutantes viviendo un apocalipsis (X-Men: Days of Future Past, 2014).
Por embargu, según vamos alloñándonos, paez paradóxicamente que la cosa se vuelve más realista, pos nun nos paez tan lloñe como aquello un mundu afeutáu por un virus que pon en peligru a la humanidá, como na novela Afterland de Lauren Beukes (2020), nel videoxuegu Crysis 2 (2011) o nel xuegu de rol Shadowrun (1989). Anque nesti caberu, por si fora poco que va unos años apaecieren elfos, nanos y de too, en 2023 fúndase tamién la primer nación de troles y güercos. Y mientres qu’una llei norteamerica sentencia qu’estos metahumanos tienen los mesmos drechos que cualesquier otru ciudadanu, el Papa Xuan XXV nun ta tan d’alcuerdu, y nuna visita a Fátima sollevanta a los fieles pa que s’enfrenten a les creatures non dafechu humanes. Bono, la verdá qu’equí, con too eso de que la maxa vuelve a la Tierra, pasáronse trés pueblos.
Y tenemos tovía más, porque nun ye tan allocada la idea del videoxuegu State of Emergency (2002), nel que ye en 2023 cuando una crisis económica fai feble’l gobiernu de los EEXX, y una megacorporación aprovecha y toma’l so llugar. De megacorporaciones va tamién Perfect Dark (2000), pero resulta enforma más fantasiosu porque metá le competencia de dos d’elles métense civilizaciones estraterrestres.
Ah, y en 2023 ambiéntase tamién l’anime Top o Nerae!/Gunbuster (1988), nel qu’unes mocines a les que nun-yos sobra ropa guíen robós xigantes pa enfrentase a estraterrestres.
Y bono, más nada, que dende Refuelgu deseámosvos feliz añu y prósperu añu nuevu.
