Estos díes son díes de novedaes nos videoxuegos. En Los Ánxeles ta cellebrándose’l que ye’l mayor certame mundial de la industria de los videoxuegos: L’E3. Nél, les principales compañíes del seutor dan anuncia de los títulos nos que tán trabayando o que van sacar nos próximos meses. ¿Qué novedaes mos trai l’E3 esti añu? Equí vamos facer un repasín de les más importantes:
Bethesda & Microsoft:
Starfield:
La compañía que ta darrera títulos como Skyrim o Fallout 3 y que mercare Microsoft va poco, tuvo una de les conferencies más esperaes de toes. Nella dieron anuncia de la salida de Starfield, el RPG espacial qu’aspira a ocupar el puestu que Star Citizen nun quixo ocupar: El ser el RPG espacial de referencia. Starfield propónnos un universu nel que podemos escoyer qué facemos nun mundu espacial: robar otres naves, comerciar, lluchar en guerres… L’anunciu ye pal 11-11-22; un mou al que mos tienen yá avezaos cuando sacaren Skyrim el 11-11-11. La salida espérase que seya pelo menos igual d’esperada que la d’aquel Elder Scrolls. Esperábase que s’amosare un conteníu del gameplay del xuegu, pero, por desgracia, entá va haber qu’esperar.
Stalker 2:
Ambientáu nes ruines de Chernobyl, el Stalker yá sorprendiere cuando saliere. Agora la compañía americana presenta otru títulu que ye secuela d’aquel: Stalker 2. Un shooter con elementos de terror que mos lleva a la “no man’s land” de Chernobyl, onde la radiación provocó la mutación de delles criatures horribles a les qu’hai que combatir. La xente falando llingües eslaves (Suponemos qu’ucranianu o rusu) fai que’l xuegu seya más inmersivu y tea más trabayáu.
Battlefield 2042:
Amás de DLCs pa otros xuegos y otres revelaciones menores, otru de los títulos que más espeutativa espertaben de toos yera Battlefield 2042. Nesta nueva entrega del xuegu de tiros, vamos a un futuru próximu (Dientro de 21 años) nel que la tecnoloxía ye asemeyada a la qu’hai anguaño. A xulgar pol video, nun se trata d’un xuegu que busque’l realismu y va más hacia l’arcade de títulos como Call of Duty.
Age of Empires 4:
Ye raro anunciar un xuegu d’estratexa. Ye aínda más raro innovar nella. Age of Empires 4 nun se pue dicir qu’innove, pero sí que retoma’l camín del que probablemente seya’l xuegu más influyente d’estratexa en tiempu real. Age of Empires 4 da una vuelta atrás y llévanos a la edá media; depués de que viviéremos Age of Empires 1 na dómina clásica, la 2 na medieval y la 3 nos primeros tiempos del renacimientu, esti títulu llévanos a los tiempos del títulu de más sonadía de toos, el 2. ¿Puede falase en propiedá d’un títulu nuevu, o tamos énte un remake del 2? Habrá que xugalo…
Ubisoft:
Rainbow Six: Extraction
Ubisoft ye la principal compañía europea que tuvo presente nel E3. La multinacional francesa anunció “Rainbow Six: Extraction”, un xuegu de tiros que mos lleva a un escenariu apocalípticu nel qu’una forma de vida que paez estraterrestre pero con una estética bien zombie. El xuegu paez mecer elementos de terror con elementos shooter d’un mou que recuerda a Mass Effect.
Far Cry 6:
Far Cry ye una de les propuestes en shooter arcade más interesantes de la compañía y la so sesta entrega una de les más esperaes. Ambientada nuna dictadura caribeña, Far Cry 6 cambia d’allugamientu y d’hestoria en rellación a les entregues anteriores. Nel videu del Far Cry vamos poder conocer más al dictador y malu malísimu. La fecha d’entrega del títulu ye tamién pa bien ceo. El 18 de febreru espérase que salga a nivel mundial.
Avatar: Frontiers of Pandora
La película d’avatar tien yá un tiempu, pero esto nun quita pa qu’Ubisoft apueste por ambientar nel so universu un videoxuegu que vien a enantar lo que s’esplorare yá n’avatar.
Los ausentes:
Bloodlines 2, ye ún de los títulos más esperaos que tuvo ausente de la conferencia. El cambiu de la compañía nel equipu que lu taba desendolcando ye la primer causa. D’esti xuegu llegóse a conocer una parte del gameplay; una de les coses que les compañíes nun suelen amosar a nun ser que se tea nuna de les fases más avanzaes del desendolcu.
Activision
Vampire: The Masquerade Swansong
Énte l’ausencia de Vampire – Bloodlines 2, allegrámonos al ver la llegada de Vampire The Masquerade, el trailer d’un videoxuegu d’Activision ambientáu nel mesmu universu del xuegu de rol Vampire: The Masquerade. ¿Llegaremos a ver a Bloodlines 2? Pel momentu fáisenos difícil, pero… ¿Quién sabe?
