La Cometcon ye la mayor (y meyor) cita cultura que tien Asturies a lo llargo del añu. Nació en 2013 nel conceyu d’Uviéu y, d’entós p’acá, nun fixo más que medrar añu tres añu. En consecuencia, el gobiernu del conceyu d’Uviéu, empeñáu en destruyir cualquier tipu de cultura que nun seya ópera, nun fixo más que pone-y pilancos a la organización de la inminente Cometcon 2020, qu’acabó emigrando a Xixón, polo que ye ellí onde va desendolcase esti añu.
1. Ye del 3 al 5 d’abril
En xeneral la Cometcon desendolcábase nel mes de marzu. Imaxinamos que por tola problemática de la “emigración” dende lo qu’en Fallout 3 bien llamaben el “Yermo Capital” a la ciudá de Xixón. Al igual qu’otros años, el programa d’actividaes estenderáse a lo llargo de trés díes nos que va haber bien d’actividaes simultánees que van cubrir la mayoría de les hores.
2. Los videoxuegos, con más presencia
Anque la Cometcon nun ye namás videoxuegos, sinón qu’hai tamién presencia de la lliteratura, el rol, el cine, el cosplay la música, la ilustración y el cómic; los videoxuegos son el “platu fuerte” d’esta edición. A Xixón vendrán figures del panorama del videoxuegu como’l presidente de l’Asociación Española de Videoxuegos (AEVI) y una bona riestra de diseñadores de videoxuegos de milenta compañíes.
En total, va haber 20 desarrolladores de videoxuegos amosando’l so conteníu, polo que podríemos dicir que la Cometcon ta en víes de convertise na “nuesa pequeña E3”
3. Una presencia non solo teórica
La presencia de los videoxuegos nun ye solo teórica. Esto ye, nun va llendase l’actividá a falar de videoxuegos y a les múltiples conferencies que va haber. Los organizadores de la Cometcon confirmaron yá que va haber 50 consoles y simuladores, 10 puestos de realidá virtual y setenta ordenadores de sobremesa.
4. Rol n’asturianu
El rol n’asturianu tamién va tener presencia na Cometcon. Va ser posible participar en partides de rol del xuegu Depués d’Ochobre tanto en castellán como n’asturianu y descubrir l’aventura básica que vien incluyida nel xuegu de base. Eso sí, pa poder tenelu mercalu y tenelu va haber qu’esperar a finales de mayu entamos de xunu de 2020.
5. Va haber cantidá de tiendes
La Cometcon 2020 ye la más grande de toles que se fixeron y eso va vese tamién nel númberu de comerciantes, artesanos y creadores que van dir a ella. Dende la organización confirmaron la esistencia de 54 stands, 126 puestos de doce comunidaes autónomes y de les principales ciudaes asturianes.
1 comentariu