Noah Hawley, showrunner de Fargo o Legion, lleva un tiempu trabayando nun proyeutu nuevu, y esti ye nada menos qu’una serie de la famosa franquicia d’horror espacial creada por Ridley Scott. ¿Qué podemos contavos d’ella? La verdá que yá unes cuantes coses.
Per un llau, que Hawley ye mui fan de les dos primeres películes, y quier provocar nos espectadores una sensación paecida a la que-y provocaron estes la primer vegada que les vio. Per otru, que nun va usar personaxes d’estes entregues nin yá vistos en nenguna otra, pos va asitiar la serie primero d’elles, lo que sedría a finales del sieglu XXI (la primer película asítiase en 2122). Amás, como novedá na saga, pelo menos no que ye los medios audiovisuales (non nos cómics), l’aición va desendolcase na mesma Tierra y non n’espaciu o otros planetes. Esto a Hawley paéz-y especialmente interesante, pos pa ello ha imaxinar cómo ye’l mediu ambiente, el gobiernu o la teunoloxía d’esa dómina. Yá sabemos, polo visto en películes anteriores, que ye un mundu gobernáu por grandes corporaciones, pero’l showrunner tamién diz que quier dexar un poco de llau la más conocida de la saga, Weyland-Yutani, pa poner el focu d’atención n’otra.
La serie, de la canal FX, va escomenzar a rodase esti mesmu añu, anque como tán dando prioridá y va dir primero la temporada nueva de Fargo, ye probable que nun la veamos estrenada hasta 2024.
