El Señor de los Aniellos, la obra de fantasía moderna más influyente de la lliteratura, adautóse al Cine en 2001, va anguaño 20 años. Daquella, algamó una reconocencia perimportante y convirtióse (y entá ye anguaño) na película con más premios Oscar de la historia y va poco salió a la venta n’asturianu (pues mercala equí).
Dos décades depués, Amazon ta trabayando nuna serie basada nel mundu imaxinariu de JRR Tolkien, anque ambientada munchos sieglos primero de los socesos que tienen llugar na triloxía orixinal. ¿Cuál ye l’estáu de los trabayos
1.- Entá nun hai una data:
La serie aínda nun tien previsa la fecha de llanzamientu. Hasta’l momentu, tolo qu’hai son especulaciones alredor de lo que son los plazos normales.
2.- Va costar más de 500 millones de dólares.
Al paecer, va costar más de 500 millones de dólares, lo que va asitiala como una de les series más cares de la hestoria sinón la más cara de toes. Por facer la comparanza, un capítulu de Xuegu de Tronos asitiábase alredor de los 10 millones d’euros, colo qu’una temporada de 10 algamaba la cifra de 100 millones de dólares. The Crown, la serie más cara de toes, perpasaba los 130. Nel casu de la serie d’El Señor de los Aniellos paez que les cifres van muncho más alló. Eso sí, al paecer, la metá d’esta cantidá, 250 millones d’euros, gastaríase en conceutu de drechos d’autor pal Tolkien Estate.
3.- La serie aparóse en 2020 pol andanciu
La serie aparóse en 2020, foi d’esti mou una de les munches series que l’andanciu dexó pa prau. Con too, paez que la idea de siguir desendolcándola va llevase a la práutica.
4.- Ye una precuela.
La hestoria asítiase nuna dómina anterior a los socesos d’El Señor de los Aniellos, pero munchos de los personaxes qu’apaecen nella van tener un rol perimportante depués. La dómina na que se desendolca ye la denomada Segunda Dómina del Mundu, tiempu nel que Sauron, l’enemigu n’ESDLA; creó l’Aniellu Únicu.
5.- Acutáronse 5 temporaes.
Nel alcuerdu de 500 millones d’euros, prevese la esistencia de cinco temporaes distintes de tala manera que, polo menos, se cuente una hestoria entera. Con too, los productores dexen la puerta abierta a poder desendolcar la hestoria y amestar nueves si la recaldación ye bona. La primer temporada va tener 20 episodios.
6.- Va siguir col canon.
Hai bien de coses que Tolkien dexó ensin respuesta, y la serie d’Amazon va vese obligada a dar respuesta a munches de les entrugues o situaciones que van apaecer. Con too, alcordóse qu’esta llibertá de desendolcu y interpretación nun contradiga nada de lo que dixere Tolkien nos sos trabayos, non namás n’El Hobbit y n’El Señor de los Aniellos, sinón, tamién, en tola obra posterior que fixere depués y toles notes que fixo.
