Va tiempu que s’especula cola coles carauterístiques de la próxima máquina de Nintendo, pos esta, anque muncho más esitosa que l’anterior, Nintendo Wii U, tien yá más de seis años. Eso, anguaño, ye yá bastante pelo menos como pa qu’empiecen a pensar n’otra. Y, por supuestu, na compaña yá lleven tiempo trabayando nella, y d’a poco y a poco van llegándonos dellos detalles sobre ella.
De fechu, va namás un par de díes que’l presidente de Nintendo, Shuntaro Furukawa, anunció que la xente va poder siguir cola cuenta de Switch pa xugar na máquina nueva, lo qu’asegura una continuidá que n’otres transiciones nun tuvimos. Ello indicaría que, pola mor del ésitu de Switch, taríemos más bien ente una especie de “Switch 2”, talamente como la Wii U siguió l’espíritu de Wii, anque non con munchu ésitu (de fechu, el propiu presidente indicó que ye dalgo que nun ficieren bien siempre). D’ello podría tamién siguise (too indica a ello anque nun hai confirmación) que nun volveríen a dixebrar lo que ye la máquina de mesa de la portátil, uníes na Switch cuando, dende la salida de Game Boy en 1989, Nintendo siempre les tuviera dixebraes.
Per otru llau, sabemos que les empreses desendolcadores de videoxuegos yá tienen información sobre la máquina, pos va poco qu’Ubisoft mencionó qu’ún de los sos xuegos, Mario + Rabbids: Sparks of Hope, va salir pa ella. Pa que tean desendolcándolo pa esta tienen de saber yá abondes especificaciones, por más que Shuntaro diga que tovía tán en procesu d’investigar nueves teunoloxíes y nun se zarren a nada. De fechu, la cosa ta tan adelantrada qu’hai rumores de que van anunciala yá a finales d’esti branu, anque paez que nun vamos poder tenela pa estes navidaes, porque aseguren que nun va salir a la venta hasta, pelo menos, el trenta y ún de marzu de 2024 (¿por qué una fecha tan exauta?, ¿qué ye, que va salir l’ún d’abril?).
Y ye que Nintendo Witch tien tovía un añu bien movíu con toles estrenes que s’esperen (nuevos Persona, Fire Emblem o Digimon, y grandes esclusivos con Pikmin 4 o Professor Layton and the New World of Steam). Pero la cosa pinta a que yá queden poques bales en cargador, y tenemos munches ganes de saber cuála va ser la siguiente arma.
