A un mes andáu de 2021, queden atrás les navidaes y ye’l momentu de falar de les que van ser les grandes novedaes d’esti añu 2021. Munchos proyeutos retrasáronse en 2020 por mor de la Covid (y d’otres cuestiones, qu’a fin de cuentes los retrasos nesti seutor son bienc orrientes) y quedamos énte un 2021 que se presenta con munches coses perinteresantes en materia de videoxuegos.
Esti artículu nun pretende facer un repasu a too (diben facer falta dellos), pero sí un poco poner l’acentu nos que mos paecieron los proyeutos más interesantes que se tán preparando nesti 2021.
Far Cry 6: Otra vuelta de tuerca
Nesti dixital declarámonos fans d’Ubisoft (non, nun mos paguen), y nun podemos más que mirar con impaciencia pal llanzamientu del Shooter más arcade de la casa: La Saga Far Cry, que llega agora a una sesta entrega (daqué bien inusual y que namás ta reservao a unos pocos xuegos). Nesta ocasión, l’estudiu francés decidió asitiar l’aición nuna dictadura Caribeña, que recuerda de dalguna manera a la Grenada qu’invadieron los Estaos Xuníos. El xuegu preséntanos a un dictador carismáticu que va ser l’enemigu final. Recuérdanos muncho nel plantegamientu al Far Cry 5, onde una secta se facía col control d’una bona parte d’un estáu rural d’Estaos Xuníos.
Polo qu’amosaron en términos de gameplay, la xugabilidá y les dinámiques son les mesmes de siempre, pero nun ambiente distintu. Lo que mos llama l’atención (pa mal) ye la presencia de zombies nel xuegu? ¿Una manera de siguir la eterna moda? Esperemos que la xustificación en términos d’historia tenga dalgo de sentíu. Polo pronto, anque interesante, paez menos innovador de lo que fore’l 5.
Lord of the Rings: Gollum; na Guerra del Aniellu ensin armes
Agora qu’Ediciones Trabe sacó’l primer volume de La Sociedá del Aniellu, ye quiciabes momentu pa echa-y una güeyada a los títulos que s’inspiren na saga de Tolkien. El que ta previstu pa esti añu, Lord of the Rings: Gollum, ye de lo más interesante. Presenta la innovación d’ambientar la historia y contala dende’l puntu de vista de Gollum que, pal que nun lu conoza, ye una criatura esmirriada y desarmada, anque discreta. Tou un desafíu y un cambiu pa un xuegu nel que tábemos avezaos a xugar con hobbits, humanos, elfos y nanos.
Por desgracia aínda nun tenemos nengún videu que mos dea una idea de cómo va ser la dinámica del xuegu, si vamos tar ente un mundu abiertu, un xuegu de discreción o qué. ¡Habrá que tener paciencia!
Stray: Una aventura de gatos y robots
Stray ye otru xuegu interesante nel plantegamientu que ye de lo más orixinal que vamos ver en 2021. Plantéganos un mundu nel que’l ser humanu yá nun ta (Nun se sabe si porque coló de la tierra o porque desapaeció), y el planeta ta pobláu namás polos robots que fixo’l ser humanu. Nesti xuegu y con estes premises vamos encarnar a un gatu que va dir resolviendo puzzles pa pasar per distintes zones. Tanto na estética, como na xugabilidá y hasta na música, recuérdanos munchos al xuegu indi Machinarium. ¿Inspiraríense nél?
Avowed: ¿Un sustitutu pal Elder Scrolls que nun mos quieron dar?
A los fans de los xuegos de rol medieval-fantásticos aprovez-yos la llegada d’Elder Scrolls 6, la continuación d’Elder Scroll V: Skyrim, un xuegu que salió va 10 años (en 2011) y que yá vagaba tener la secuela. Y como’l socesor de Skyrim faise de rogar, esti xuegu tien toles papeletes pa enllenar esi llugar baleru. ¿QUe por qué? Pola cenciella razón de que ye Obisian Entertainment la compañía que ta darrera. Una compañía que tien mui bona esperiencia nel desendolcu de RPG en títulos como Caballeros de l’Antigua República (de Star Wars), Neverwinter Nights (de DUngeons & Dragons) o, l’archiconozíu Fallout New Vegas, el que pa munchos xugadores y espertos nel xéneru ye’l meyor de tolos Fallout que se fixeron. ¿Qué pue salir mal?
¿Y vós? ¿Por qué xuegu tais aguardando?
