¿Apetezte xugar al rol? (ye una posibilidá)¿Nun tienes con quién facer una mesa presencial? (ye casi seguro una certitú). Como la mayoría de xente rolero ta na mesma situación, surdió va pocos díes una prestosísima iniciativa que tien por oxetivu’l facer más amañoso atopar una mesa de rol, un grupu y un master o otros xugadores. Esta iniciativa ye #ConRolNoHayVirus, un grupu de facebook públicu que podéis ver equí.
Nesti grupu, que ñaz col envís non tanto de xenerar comunidá como de poder empareyar a xugadores y direutores de xuegu, ufiértense partíes de rol de lo más estremao: Mundu de tiniebles, L5A, D&D y los xuegos más clásicos y conocíos. Sicasí, ye tamién un llugar en que ye posible ver nueves creaciones y xuegos fechos por persones individuales que busquen la manera de probalos o de, yá probaos, siguir xugando con xente.
¿Cómo funciona?
De mano, hai que buscar grupu. Esto ye más fácil por mor d’un excel públicu qu’intenta reagrupar toles partíes qu’hai y nel que s’encamienta a la xente a caltenelu actualizáu diariamente coles partíes que tán llenes, les que tienen places llibres y demás.
¿Qué otres ferramientes s’empleguen?
Pente les ferramientes que se pueden emplegar pa xugar a xuegos de rol online destaquen páxiens web como Roll20 ( https://roll20.net/ ) que tien una bona riestra d’utilidaes que van dende suplementos, fueyes de personaxe, simulador de tiraes y mapes o como Dadiños, un simulador cenciellu que reproduz tiraes virtuales de los dados más comunes nos xuegos de rol.
Yá nun tenéis escusa pa echar unes partíes primero de que llevanten la cuarentena.
