Por Blanca Fernández

De xuru que tas de ver, nos caberos años, a xente carauterizada y vistida como personaxes d’anime, videoxuegos, películes o anguaño series…esta xente nun ta solo amazcarándose, como facemos nel Antroxu…esta xente ta faciendo cosplay.

La palabra cosplay ye una combinación de les pallabres ingleses costume (disfraz) y play (xugar), y la so definición sedría “amazcarase de daquién actuando y portándose como él”. Sicasí, esta segunda parte nun ye obligatoria, y munchos cosplayers nun la faen. A estos traxes nómaselos cosplay, y a los que los lleven cosplayers. Pero’l vocabulariu que tenemos pa falar de cosplay nun queda equí: tamién atopamos la distinción, dientro de los cosplayers, de cosmaker (que fai’l traxe) y cosmodel (que merca’l traxe). Amás, tamién se llama cosmaker al que fai traxes pa él o pa otra persona, y propmaker al que fai accesorios o armes o complementos.

L’orixe

Como siempre pasa, hai enguedeyu nel orixe del cosplay, y l’enguedeyu ye ente Xapón y Estaos Xuníos. Hai semeyes y testimoniu que nos Estaos Xuníos, yá nos años 30, la xente diba a les convenciones de cómics y ciencia ficción amazcarada, colo que podía, de los personaxes de los cómics americanos y ciencia ficción. Per otru llau, nos años 70, en Xapón entamen a facese convenciones de manganime y videoxuegos, y la xente entama a amazcarase y a actuar como los personaxes, y entama a usase’l términu “cosplay”, y incluise la parte d’actuar. Esta afición esportase fuera de Xapón y llega, ente otros sitios, a Europa y a España.

El cosplay: un fenómenu global

Magar que’l cosplay entama como daqué puntual, pa dir a convenciones colos collacios y collacies, fechu colo que teníes por casa o como muncho mercando teles y tentando de coser daqué asemeyao, colos años va algamando siguidores y aficionaos que van ameyorando la calidá y les téuniques. Col pasu los años, y tamién cola globalización, entamen a apaecer tiendes especializaes en facer peluques y estos traxes, que se merquen per tol mundu. Pero nun solo apaecen tiendes d’esta mena, tamién apaecen tiendes que vienden materiales enfotaos pa cosplay o recreación, onde vienden gomaeva de distintos grosores, resines especiales y materiales como worbla o thibra (de los que vamos falar más alantre).

Anguaño hai xente que se dedica al cosplay profesionalmente, como modelu pa delles tiendes o empreses, como creador de tutoriales o de cosplays o como artesanu que viende les sos creaciones o les fai per encargu.

Amás, fáense dende va años concursos de cosplay, qu’entamaron con premios pequeños, como podíen ser llotes de productos, pero qu’agora munches vegaes tienen premios monetarios y materiales de cosplay. Hai distintos tipos de concursos: dalgunos impliquen facer una actuación con attrezos y otros son de pasarela y puntúen solo’l traxe y la caracterización. Dellos son internacionales, como ye’l World Cosplay Summit(WCS) o el European Cosplay Gathering (ECG), incluyen dir representar al to país nuna final con distintos cosplayers d’otros países. N’España tenemos tamién un concursu internacional, que cada añu trai representantes de dellos países: el International Cosplay League (ICL), anque de momentu ta suspendíu pola pandemia.

Ónde puedo atopar cosplayers

Los cosplayer suelen dir a convenciones, como la Cometcon o la Metrópoli Comiccon, equí n’Asturies, o’l Manga Barcelona (enantes nomáu Salón del Manga de Barcelona) o Japan Weekend Madrid. Nestes convenciones suel haber concursos, charres venceyaes al cosplay, cosplayers invitaos que van a conocer a los sos siguidores…pero col coronavirus les convenciones tán pospuestos indefinidamente.

Pero qu’esto nun vos esmoleza, porque la forma más fácil d’atopar a los cosplayers ye nes RRSS: los cosplayers muévense muncho n’Instagram, Youtube, Twitter, Tiktok, Facebook…onde suben les sos sesiones de fotos, tutoriales, lo que tán faciendo,…y nun ye raro atopar cosplayers con más de 100.000 seguidores, y dellos incluso con 1 millón o más seguidores, como ye’l casu de Enji Night, Geheichou o Shirogane-sama.

El mundu del cosplay ta espoxigando cada vegada más y xuniendo a xente con intereses y aficiones asemeyaes. Si quies saber más, vas atopar equí más artículos falando d’esta afición.

Leave a Reply

La to direición de corréu nun va espublizase. Los campos riquíos márquense con *