¿Qué ye’l “Pixel Art” o “Bit Art”?

Cada época histórica tien los sos propios movimientos culturales, artísticos y pictóricos. Ye difícil falar del sieglu XIX ensin facer referencia al Romanticismu o del sieglu XII ensin tener en cuenta’l Románicu. Pasa lo mesmo, anguaño, con otros estilos y influencies que vienen de les nueves teunoloxíes. L’emplegu del ordenador ye práuticamente un deber pa cualquier ilustrador o ilustradora que quiera trabayar y vivir comercialmente del so arte en 2020.

Emplegar una “tablet” pa pintar un dibuxu nun quier dicir que l’arte camude. Del mesmu mou qu’emplegar un móvil pa falar nun tien por qué cambiar lo que dicimos respeutu d’un teléfonu fixu. Sicasí, hai visiones artístiques que sí que tán bien enraigonaes nel mundu de la informática y, más concretamente, nel de los xuegos d’ordenador (y sí, dicimos xuegos d’ordenador y non “videoxuegos” porque ye de les aventures gráfiques noventeres d’onde bebe esti tipu d’arte: el Pixel Art o Bit Art.

Les aventures gráfiques y la so influyencia nel arte

Les aventures gráfiques son un xéneru de videoxuegu que, anque siguió esistiendo y tovía esiste, tuvo’l so momentu cume nos años 90. Trátase de videoxuegos (xuegos d’ordenador stricto sensu) nos qu’hai que resolver rompecabeces, misterios lóxicos y, dende llueu, tener una bona observación. De los años 90 son les aventures como Legend of Kyrandia (1992), Eternam (1993) – qu’esplora esautamente’l mesmu tema que Westworld y ta basáu na mesma novela, pero cuasi 30 años primero – Myst o, toles aventures gráfiques de LucasArts, la firma de moda de la dómina pente les que rescampla perriba de toes el míticu Monkey Island. Broken Sword, Sam & Max: Hit the Road, Indiana Jones, King Quest, Broken Sword, Simon the Sorcerer, les de Sherlock Holmes… completen la llista de les aventures gráfiques mitiquísimes coles que medraron los neños y neñes de los 90 que tuvieron la suerte de tener un ordenador en casa.

En toes aquelles aventures, non solo había una mesma dinámica (masque nunes quixere dáse-y a too un tonu más “de mieu” como Myst o más “humorísticu” como en Monkey Island o Sam & Max. Toes elles teníen un mesmu aire de familia gráficu al que contribuyeron la manera de facer les coses daquella y les propies llimitaciones – ¿O habilitaciones? – de los ordenadores de la dómina. Esta manera de facer los gráficos yera al traviés de dibuxos nos que les formes son pixeles de colores estremaos combinaos. Depués, col tiempu y el correr de los años, aportaron a la industria del videoxuegu otres maneres de facer les coses y, tamién, ediciones “remasterizaes” o “repasaes” de les vieyes glories… Pero pa esi momentu l’Aventura Gráfica como xéneru de videoxuegos yá nun taba na posición na que tuvo daquella… ¿Un xéneru qu’avieyó, o una estética que nun mos acaba de prestar?

El pixel art fuera de les aventures gráfiques

El casu ye que, muertes les aventures gráfiques (o, en tou casu, muerta la so dómina d’esplendor) daqué quedó de too aquello. L’arte. Delles persones ven nel arte fechu con pixeles un daqué estético que nun se-y ve a otres maneres de facer les coses. Del mesmu mou que la pintura que ye semeya nun presta, tampoco presten les aventures gráfiques o l’arte per ordenador qu’acaba siendo como una semeya. Hai daqué de señardá, ta claro, pero tamién otra manera de facer les coses, nes aventures gráfiques de los años 90 que mos recuerda de dalguna manera al cómic y que yera, a fin de cuentes, la esperiencia más asemeyada qu’esiste a tar dientro d’ún.

D’esti mou, el Pixel Art (o Bit Art), ye la manera de llevar esa estética a l’actualidá. Bien seya en videoxuegos o aventures gráfiques que busquen otra vuelta imitar la estética de los 90 (anque hai capacidá anguaño de facer les coses con munchísimos más recursos) como ye’l casu de Thimbleweed Park, otra aventura del mesmu creador de Monkey Island. Pero tamién nel fechu de crear dibuxos nesta modalidá artística coles mesmes pretensiones que podríen crease una acuarela o una pintura a llápiz. Ún de los artistes más importantes del Bit Art ye Octavi Navarro al que podéis sofitar equí y del que la presencia ta confirmada na Cometcon 2020.

¿Cómo se deprende’l pixel art? Como munches otres coses nueves, ye raro que’l pixel art tenga espaciu nos programes educativos; non solo yá de la primaria o la ESO, sinón, tamién, nes propies factulaes de Belles Artes, onde nun se lu estudia como un xéneru propiu. Sicasí, pal que quiera somorguiase nestes téuniques que tan bonos resultaos dan, hai bien de video-tutoriales pela rede como ésti qu’apurrimos equí y adautaos a práuticamente tolos niveles.

Pixel Art Isométricu

Anque nuevu, el xéneru del Pixel Art tien tamién los sos soxéneros. Y los que lu traten, tienen el vezu de dixebrar les obres de pixel art en dos grandes categoríes: D’una banda les non-isométriques, como les qu’acabamos de ver hasta agora o les que fai Octavi Navarro; y d’otra banda les isométriques, que son menos comunes pero de les qu’hai tamién una bona montonera d’exemplos. Pa pensar nel Pixel art isométricu, habría que pensar nel Habbo Hotel, que diba ser el primer exemplu (o’l más conocíu de toos) nes qu’un programa emplegaba de mou principal esti tipu de diseñu.

Habbo Hotel foi una de les coses más curioses de los años 2000 que nun volvió a vese d’entós p’acá. Pertenez a esti grupu d’aplicaciones a mediu camín ente una rede social y un videoxuegu como Second Life que, anque tovía esisten, nun tienen el puxu que tuvieren d’aquella. Trátase de dibuxos que representen per aciu de la perspeutiva, dimensiones en 3D. Hai que dicir qu’esti tipu de Pixel Art úsase tovía en bien de xuegos. Munchos d’ellos, xuegos de móvil, pero tamién en xuegos d’estratexa o de simulación de ciudaes, si bien ye verdá que suel tratase de títulos de videoxuegos más “casual”.

¿Yes asturianu/a y faes Pixel Art? ¿Faes Pixel Art n’asturianu? Nun duldes en contautar cola redaición de Refuelgu en redaicion@refuelgu.com y contamos la to hestoria.