Cuando falamos del andanciu y del impactu que supón pal mundu de la cultura y del ociu no primero no que se piensa ye, polo xeneral, nos conciertos qu’acabaron suspendíos y nos músicos que nun pueden dar xires. Esto ye tovía más grave nel casu de los grupos de música y cantantes profesionales que teníen la música como forma de vida o como una gran fonte d’ingresos. (Nun son pocos los grupos de música que tán nuna situación de semi-profesionalidá na que compatibilicen una media xornada o un trabayu estacional cola música).
Sicasí, l’andanciu del coronavirus tamién acabó afeutando a otru coleutivu: El rol en vivo. Primero de la declaración del Estáu d’Alarma yera habitual que cada fin de selmana se desendolcaren partíes de rol en vivu n’estremaos puntos de la xeografía del Estáu. Estes partíes solíen desendolcase, como norma, en llugares rurales como podríen ser campamentos, pueblos deshabitaos o finques que s’allogaben pa la ocasión. Nelles recreábense dómines pasaes o mundos que nun esistíen nos que yera posible interpretar a personaxes que falaben, lluchaben, mataben y morríen.
Sicasí, cola situación y los rebrotes nos que tamos; con toles torgues (lóxiques) a cualquier actividá qu’implique un contautu social, el poder facer esti tipu d’actos ye bastante inviable. ¿Morrió entós el rol en vivo? O, dicho d’otra manera, ¿Ta’l rol en vivo en “Stand by” el tiempu que dure l’andanciu?
El rol en vivu redefínese
En realidá, la respuesta a esta entruga camuda muncho acordies colo qu’entendamos por rol en vivo. Si entendemos por rol en vivo eses sesiones presenciales, ta claro que’l xuegu morrió. Pero, en realidá, y como apunten dellos, el pasatiempu nun fixo más que reinventase a sigo mesmu. D’esti mou, surdieron va poco partíes telemátiques que pueden ser de munches temátiques distintes. Ta claro, integrar un vídeo nun ye lo más amañoso pa una partida de rol en vivu de calter medieval; pero sí pue ser una manera interesante d’esplorar el rol en vivo ambientáu n’otres galaxies y sistemes solares.
Otra de les coses que se fixeron, amás de les partíes online per aciu de preseos como Skype, foron entrevistes a personaxes. Una suerte de “precuela” d’otres sesiones más tradicionales que deberíen desendolcase más alantre. No que paez que coinciden los más de los amantes d’esti tipu de xuegos, ye na señardá que tienen pol tiempu en qu’esistíen. ¿Volverán los xuegos de rol en vivo “clásicos”? En refuelgu cruciamos los deos pa que sí.
