Por Blanca Fernández
Si nel primer artículu de Refuelgu falando de cosplay diximos qué yera y dimos una idea xeneral, nesti vamos dir a lo práutico, a cómo metese nesta afición, bien sía pa prebar, porque siempre te prestó amazcarate, porque t’apetez, pa cuando haya convenciones otra vez dir, pal Antroxu o pa facer cuatro semeyes en casa o un videu pa Tiktok.
Lo primero de too ye estremar cosplayer (que fai cosplay, lleva un cosplay puestu) y cosmaker (que fai’l traxe). Nun vos esmolezáis, podéis facer dambes, y pa les dos tenéis una montonera de ferramientes y recursos n’Internet. A parte de too esto, hai delles partes, como puen ser lentilles o peluques o maquillaxe, que pues necesitar da igual cuál sía la to opción. Güei vamos falavos d’ónde mercar los traxes y les peluques.
Ónde mercar los traxes
El sitiu más fácil p’atopar un montón de variedá de traxes ye n’Aliexpress. Con buscar la pallabra cosplay yá vais atopar un montón de traxes y accesorios. Sicasí, ye recomendable, pa nun tener tantísimos resultaos na busca, especificar qué buscamos, como por exemplu “Harley Quinn Cosplay”. Amás, equí podéis facer la busca tanto n’inglés como castellán. Ye importante fixase nes imáxenes de referencia del productu, y ye meyor si’l productu tien reseñes con semeyes de xente que yá lu mercara. N’Aliexpress delles tiendes perconocíes tamién tienen la so propia tienda, polo que les que vos voi recomendar nes siguientes llinies ye normal atopales tamién n’Aliexpress.
Tanto pa mercar traxes n’Aliexpress como nes siguientes ye importante fixase na tabla de talles, porque polo xeneral son talles asiátiques, que son más pequeñes que les d’Europa. Tenéis que midivos pa pidir y que vos valga.
Agora vamos falar de delles tiendes conocíes enforma y los traxes que podéis atopar ellí:
- Rolecosplay y L-email: nestes tiendes podéis atopar principalmente traxes d’anime, manga y videoxuegos asiáticos, y tamién del League of Legends. Podéis atopar mui bonos precios y una variedá grande de traxes. Tienen bastante variedá de talla.
- Uwowo Cosplay: suel tener una temática asemeyada a les dos anteriores. Los sos cosplays tienen munchísima calidá, sicasí son un pocoñín más caros y tienen menos variedá y talla (suel haber hasta la XL asiática).
- Miccostumes: de xuru que ye la tienda con más variedá temática de cosplays: nella podéis atopar anime, manga, series occidentales y asiátiques, películes, dibuxos,…paez que nun tien fin tolo qu’hai pa escoyer. Sicasí, ye importante fixase porque la calidá ye distinta en caún de los traxes.
- Cosplaysky y Procosplay: magar que tienen productos de toles temátiques, tienen traxes de mui bona calidá de series y películes, como puen ser de Xuegu de Tronos, Marvel o DC. Tamién podéis atopar de videoxuegos como League of Legends, Overwatch o The Witcher. Los traxes en xeneral son de muncha calidá y tán bastante llograos.
Como conseyu, lo meyor ye buscar en toes elles les opciones y comparar precios y calidaes, porque dependiendo del traxe va ser meyor una o otra. Amás, munches d’elles collaboren con cosplayers pa que faigan reseñes de los sos traxes per escritu y con vídeos pa que la xente vea el productu real.
Ónde mercar peluques
Dempués de lleer ónde mercar los traxes, poco queda que desplicar de les peluques, porque nes anteriores tiendes, aparte de vender traxes, tamién suelen vender les peluques. Ye importante que sepáis que cuando vos lleguen suelen necesitar un poco de retoque, como pue ser cortar un poco’l flequillu o peinales con llaca. N’Aliexpress vais atopar toa mena de peluques, y ye importante que vayáis a les reseñes de la xente pa ver cómo ye la peluca na realidá.
Aparte de les tiendes anteriores, hai varies tiendes que tán especializaes en peluques, y ye importante mentar dos, qu’anque son más cares, pagan la pena tanto pola so variedá como pola so calidá:
- Arda Wigs: anguaño ta asitiada nos EEXX, pero tienen pensao abrir una tienda n’Europa. Tien toa mena de peluques, de una calidá apavoriante y con una gran variedá de colores, tanto pa personaxes realistes como pa personaxes d’anime y manga y dibuxos. Amás, tienen un montón de tutoriales desplicando cómo estilizar les sos peluques.
- Assist Cosplay Shop: esta tienda xaponesa viende tamién a tol mundu una gran variedá de modelos de peluques en un montón de colores, amás d’un montón de preseos y productos pa poneles, peinales y maquillaxe.
- Coscraft: con sede n’Europa, tamién ufre peluques de bona calidá y con una variedá pergrande de colores, amás d’un montón de peluques base que pues estilizar pa cualquier cosa.
El mercáu de segunda mano
Si nun ves too esto como una opción, o quies que te llegue rápido o da-y un segundu usu a un cosplay, siempre pues buscar traxes o peluques de segunda mano (o vender los que tu faigas y yá nun vayas usar). Plataformes como Facebook, Wallapop, o Vinted, ufren la opción d’anunciar los traxes y peluques que yá nun uses, dando delles facilidaes a la hora de facer los unvíos y velar pola proteición del que compra y del que viende. Ye una manera de dar un segundu usu a esos traxes que yá nun vamos usar, o atopar un productu que llegue rápido o te escosáu na tienda. Si optes por esta opción, tate sollerte a les fotos q’ufre el que viende y a la talla.
Dempués de too esto, solo queda dicivos que vos animéis y echéis una güeyada a lo que podéis atopar, y sobre too, que teáis sollertes a tolos trucos y conseyos que vos vamos dar p’averavos a esto.
