Si nel caberu artículu de cosplay falábemos d’ónde mercar cosplays yá fechos y peluques, güei vamos falar d’ónde atopar materiales o guíes y tutoriales pa facer los traxes nós. Enantes de desplicavos nada hai que dicir que la práctica fai al maestru, y que ye guapamente pues entamar dende 0 ensin saber nada nin tener nenguna preparación previa, lo único que tienes que tener ye ganes, y (muncha) paciencia.
Lo primero de too ye falar de qué pue incluyir un cosplay, y podemos resumilo asina: parte testil, parte d’armadura, accesorios (ayalgues, collares,…), armes, peluca, carauterización y calzáu. Dellos traxes van incluyilo too o solo una parte, pero pa que vos faigáis una idea xeneral esto ye lo que normalmente forma parte d’un d’estos disfraces. Güei vamos falar de les dos primeres.
PARTE TESTIL
Pa siguir un orde, vamos falar primero de la parte testil del traxe, ye dicir, la ropa. A la hora de facer la ropa hai que tener en cuenta dos partes: los patrones y los materiales que vamos necesitar pa facela.
Facer patrones nun ye fácil, nun vamos engañar a naide, pero con Internet esto ye muncho más fácil, tenéis un montonera de tutoriales en Youtube y páxines de como facelos de 0. Una abondo recomendada ye El baúl de las costureras, onde tán desplicaos dende 0 munchísimos patrones. Tamién tenéis una opción munchísimo más cenciella, que ye sacalos a partir de ropa que tengáis en casa, o bien cortando les pieces o calcándoles con papel de calcu. Otra opción abondo fácil (y que tamién sirve pa les armadures), ye envolver la parte del cuerpu del que quies sacar el patrón con plásticu d’embalaxe y pegar encima cinta de carroceru y dibuxar el patrón. Llueu ye córtalo cola tixera.
Amás de too esto, tenéis a la venta patrones prefabricaos específicos pa cosplay, como pue ser McCalls o PatternCos (los patrones tán en PDF y tu solo tienes que los imprimir en casa).
No que cinca a materiales, vais necesitar, per un llau, teles, y per otru, filu y otres ferramientes pa coser. Volvemos a lo mesmo, Internet ufre un montón d’opciones onde comprar, pero vamos davos delles. Pa mercar tela tenéis delles tiendes online, como pue ser Etejidos, Ribes y Casals o Telas Pedro (esta tien la tienda física n’Uviéu). Si sois d’Asturies, tenéis tanto n’Uviéu como en Xixón otra tienda: El Revoltijo.
Pa coser vais a necesitar una máquina de coser, que podéis atopar en munches tiendes, como Mediamarkt, Carrefour, Amazon,…amás, LIDL suel poner cada ciertu tiempu ufiertes na tienda venceyaes a la costura y máquines con mui bon preciu. El restu ferramientes que necesitáis son tixeres, alfileres, filo,…pero nun vos esmolezáis, qu’eso vais decatavos cuando teáis nello.
ARMADURES
Les armadures son otro mundu, un mundu nel que siempre hai anovación en téuniques y materiales.
No que cinca a los patrones, a cómo consiguir facer los patrones, hai munches formes: tamién atopamos patrones base a vender fechos por cosplayers, pero’l métodu más fácil ye’l que mentamos enantes, el d’envolver la parte del cuerpu que quies sacar el patrón y dibuxalu. Amás, esto tamién s’aplica a oxetos como puen ser esferes. Como a too, hai que-y poner ganes.
Una vez tenemos los patrones, bien pasalos a un material. Hai munchos materiales que podéis usar más específicos pa cosplay, como pue ser el worbla (un termoplásticu que cuando-y das calor ye moldiable) o’l thibra, pero lo más fácil y más económico ye la gomaeva. La gomaeva haila de diferentes grosores: la que hai vender en tolos llaos ye la de 2mm, pero tamién ye bastante normal usar la de 4 o 5mm. Amás, haila entá más gorda. La gomaeva tamién ye enforma moldiable si-y das calor, pues facelo con una pistola de calor o con un secador (con esto tardes más). Ye un material nel que pues marcar pieces ensin problema con rotuladores. Pa pegala, pues usar cianocrilatu (loctite o paecío, pa que m’entendáis) o cola de contautu (esta ye muncho más llimpia, porque dexa uniones perfeutes). Pa les xuntes pues rellenar con aquaplast y lixa, teniendo un acabáu llisu. Dempués d’esto queda sellala, y pues facelo con cola o con látex.
A la hora de pintar tamién tenéis munches opciones, como puen ser pintures acríliques, pintures de spray o un aerógrafu. Magar que pa entamar son una inversión, duren muncho. Ye recomendable da-y una capa de barniz.
Aparte de too esto, tamién podéis atopar otra alternativa un poquitín menos económica: la impresión 3D. Anguaño hai impresores con precios más baratos, coles que pues imprimir formes complicaes y con acabaos perbonos. D’esti tema vamos falar más cuando falemos de facer accesorios.
Pa mercar los materiales tenéis munches opciones: tiendes como Leroy Merlín o Bricomarkt o bazares o Amazon vienden la mayor parte d’ellos. Y lo que non, podéis atopalo en tiendes más especifiques, como puen ser Cosplaymat, Feroca, Kurogami,…
Si queréis atopar tutoriales de como facer too esto, tenéis munchísimos n’Internet, y por recomendavos delles canales y cosplayers tenéis a Kinpatsu Cosplay, Kamui Cosplay y Manlima cosplay.
Dempués de falavos d’estes dos partes, agora quédavos tentar de facer daqué en casa, con paciencia.
