refuelgu, el:sust. Aición y efeutu de refolgar. 2 Rescamplíu de lluz [fuerte y repentín].
Según el diccionariu de l’Academia de la Llingua Asturiana; ésto ye un refuelgu.
Ye un refuelgu lo que sal del cayáu de Gandalf cada vuelta qu’el magu de la Tierra Media fai maxa. Ye un refuelgu lo que se ve nes ales d’un X-Wing cada vez que-y dispara a un TIE Fighter. Ye “Refuelgu” la torna de la película de terror “The Shining”. Como vemos, hai refuelgos nel cine y nel terror, na lliteratura fantástica y na ciencia ficción. Hai refuelgos nos videoxuegos, nos ataques que facía Pikachu cada vez que llanzaba un Thundershock…. Hai munchos refuelgos en munchos sitios pa los que la cultura asturiana nun ta mirando y nos que nun ta poniendo atención.
L’oxetivu de Refuelgu! ye’l de da-y lluz a tou esi panorama cultural que ta rellumando refuelgu tres refuelgu pero pal que naide mira. Queremos poner la lluz na cultura d’Asturies, pero tamién a la de fuera. Queremos un periódicu dixital que seya quién a falar de la cultura “alta” de los llibros clásicos, pero tamién de la cultura “baxa” tan baxa que namás s’asitia nel “Dungeon” d’una partida de rol y, claro, de la cultura “media” que ta entre les dos. Refuelgu quier falar n’asturianu y quier facelo de lliteratura, de fantasía, de ciencia ficción, d’historia, de política de xemes en cuando – y sobre manera cuando tien que ver cola cultura, de videoxuegos, de YouTube, de los estudios de creación qu’hai n’Asturies, de la lliteratura asturiana y de toles otres lliteratures. Refuelgu quier falar de la Cometcon de Xixón, pero tamién del E3 de Los Angeles. Quier falar d’El Quijote y del GTA, d’El Señor de los Aniellos y de Dune, del programa educativu, de la crisis de les humanidaes.
Refuelgu quier tamién falar de toes eses coses, na midida de lo posible, d’una manera na que naide nun faló primero. Faciendo por aportar daqué nuevo y una lluz propia a toes eses lluces. Por eso, cuando falemos del GTA, o del Elder Scrolls, queremos falar de xiros de guión, de narrativa, d’estética… ensin dexar de falar de xugabilidá, de Easter Eggs o de la bayura d’armes qu’hai pa escoyer. Queremos abrir la escotilla de la Battlestar y comunicar coses que nun taben comunicaes hasta’l momentu.
Queremos tener una llinia y una voz propia; pero tamién queremos sentir y da-yos un llugar a les vuestres. Queremos contar con opiniones, artículos de reflexón y análisis si son bonos, si aporten lluz, si dicen coses interesantes que naide nun dixo. Nun queremos un periódicu dixital “gafapastista”; queremos una cultura al algame de toos, abierta, plural, arguyosa de lo propio y almiradora de lo ayeno.
