En Metacritic, onde faen les medies de les distintes valoraciones que-y dan al xuegu revistes especializaes de tolos países, dan-y un 8 con dalgo (y dicimos “con dalgo” porque va variando según van llegando más reseñes). Esta ye la de Refuelgu!, qu’intentamos que seya una reseña ensin spoilers sobre’l videoxuegu más famosu y más vendíu del mes de setiembre nestos momentos.

Viaxar na frontier ye una sensación asemeyada a la de tener una autocaravana espacial. Hasta’l bañu ye como una autocaravana.

Ciudaes vides, universu vivu:

Na nuesa opinión Starfield merez esi 8 con dalgo que-y dan les crítiques; nun merez menos, pero tampoco más; y vamos desplicar por qué ensin desatapar muncho del xuegu. De mano, una de les coses que rescampla de Starfield ye la variedá de misiones y lo prestoso que son elles. Lloñe queden los tiempos de garra X, llévalo d’A a B, mata al monstruu y cobra les perres. Les coses vuélvense más complexes, tanto nes llinies argumentales principales como nes secundaries. Amás, cuando tas nuna ciudá nueva como por casu en Nueva Atlantis, la capital de les Colonies Uníes, anque heba muncha xente que se llama “ciudadanu/a”, lo cierto ye que sientes que la ciudá ta enllena de vida y les misiones práuticamente cáyente per tolos llaos. Vas al bancu y pídente que vaigas a cobrar una delda en plan “cobrador del frac” (non necesariamente violentu), o vas a la sede de les noticies a dar una entrevista, o a ayudar como fonte anónima a una periodista; o vas al barriu del gobiernu y alísteste na “Vanguardia” de combate pa ganar la ciudadanía…

Como na vida real, una manera de deprender ye dir a los museos. En Starfield hailos.

Elementu rol: meyor que nunca y lo más destacable:

Otra cosa na que se ve’l trabayu de Bethesda y la influencia de títulos como Cyberpunk, ye no bien fechos que tán los tresfondos: Si yes d’una relixón, d’un estáu, d’una profesión concreta… vas tener opciones de diálogu específiques pa esi tresfondu, que van condicionar les coses que vas poder facer. Personalmente encamentamos el tresfondu del pa y la ma (Kid Stuff); que mos permite dir a visitar a los nuesos proxenitores, que mos digan que tenemos el cuartu como una lleonera, o que mos quieran preparar dalgo pa comer. La fondura, tremenda.

Una de les coses que fai tan vivos a los xuegos de Bethesda, ye fuxir de lo épico y tar no cotidiano, como la presencia de funcionarios y oficines.
El rasgu del pá y la ma ye una de les meyores coses que pues escoyer.

Tamién, amás de Cyberpunk, vemos que Starfield bebe d’otres fontes. D’esti mou vemos que les discusiones recuerden un poco a “The Council”, tocante a la necesidá de facer verdaderes “lluches verbales” colos otros personaxes pa ser quien a convencelos. L’aspeutu “RPG” ye más fuerte que nunca, probablemente más fuerte qu’en cualquier otru xuegu de Bethesda. Y cuando falamos del aspeutu rol falamos tantu del aspeutu diálogos/misiones, como del aspeutu dir ameyorando los personaxes. Como asocede n’otros xuegos de Bethesda, vamos poniéndo-yos puntos a les distintes habilidaes a midida que xubimos de nivel; equí, amás, y na llinia de Hogwarts Legacy, pa poder xubir un puntu nuna habilidá, ríquese’l facer una serie de retos. Por casu, si quies xubir la to capacidá comercial (y negociar los meyores precios a la de vender y a la de mercar), vas necesitar primero vender una cantidá determinada d’artículos. De lo contrario, anque xubas de nivel, nun vas poder ameyorar esta habilidá, dalgo que mos paez un aciertu.

El Lore, lo que fai grande a los xuegos de Behtesda:

Pero si dalgo fai qu’un xuegu de Bethesda seya meyor qu’ún que nun lo ye, eso ye’l Lore. El Lore ye la minuciosidá cola que l’equipu de desendolcu de Bethesda construyó un mundu ambientáu nel añu 2350. Desplícase por qué la nuesa Tierra ta erma, desplícase cómo surden les potencies, les ideoloxíes, los grupos, les relixones nueves que salen y les interrellaciones (más complexes de lo que paez) ente elles. Amás, siguimos con esi prestor tan grande que ye l’entrar nuna casa y dir a polos llibros (o los ficheros informáticos almacenaos nel ordenador) y poder lleelos como si tuviéremos equí. Bethesda caltién esa maxa que fai de los Elder Scrolls una de les meyores series de videoxuegos del mundu y fai que daveres sintamos como real esi universu creáu nel que s’asitia Nueva Atlantis, el Coleutivu Freestar y demás coses (¡y les que tovía mos quedarán por ver!)

El llau negativu: les naves espaciales y el nun ser mundu abiertu

Como dicíemos al entamu, nun merez menos qu’un 8, porque ye un gran xuegu (que nun heba nenguna dulda nesti puntu) y nós aconseyámoslu pal que-y gusten los xuegos de rol porque ye un prestor xugalu; pero tampoco merez más. Starfield tien na nuesa opinión un llau negativu que-y fai recular con respeutu a xuegos como Oblivion o Skyrim y ye que nun se pue considerar un xuegu de “mundu abiertu”. Ye verdá que tanto n’Oblivion como en Skyrim o Fallout había pantalles de carga, pero ún podía dir pel mundu a pie o caballu y caminar ensin pantalla de carga dala o interrupción dende la propia puerta de la ciudá A hasta la de la B y, mientres nun entrare nuna ciudá, podía debalar llibre per tol mapa a los sos deleres.

Con too, eso nun pasa en Starfield: nun ye que nun seya un simulador espacial a lo Elite Dangerous, ye que nin siquiera intenta integrar dinámiques presentes en títulos más humildes como No Man’s Sky. Por ponevos un casu, pa dir del Planeta A al planeta B; tenemos que facer tolo siguiente: Entrar na nave, ehí sentanos y da-y a “despegar”, onde vamos tener que facer un viaxe rápidu y ver una pantalla de carga/cinemática. Depués quedamos n’órbita alredor del planeta A, y ehí de nueves vamos tener que facer un viaxe rápidu (cola so pantalla de carga) hasta tar n’órbita del planeta B, y ehí, de nueves, otru viaxe rápidu/pantalla de carga pa poder posase nel suelu d’esi planeta. En concluxón, hai que dicir que nin se pue aterrizar la nave, nin se pue despegar, y lo que ye más grave tampoco se pue viaxar nella, la única opción qu’hai pa dir d’un país a otru ye’l archiconcociú “fast-travel”.


Con too, y magar esti aspeutu negativu de la imposición del viaxe rápidu, el videoxuegu paeznos ún de los meyores que fixo Bethesda hasta agora (anque nun tea pa nós al nivel de Skyrim) y ye un gran xuegu al que paga la pena xugar.

Leave a Reply

La to direición de corréu nun va espublizase. Los campos riquíos márquense con *