Por Adrián Carbajales
DC escontra Watchmen.
Yá de mano, el conceutu en sí mesmu resulta esparatáu. Watchmen ye’l cume’l cómic de superhéroes, ensin dulda de lo meyor que tien dao el novenu arte. Y nun ye por faltar a los héroes clásicos de DC, pero la idea d’entemecelos nun me paez mui lloñe de facer una película na que Drácula s’engarrie con Ciudadanu Kane. Sabiendo, amás, que se fai col refugu d’Orson Welles. Por embargu, les grandes compañíes editoriales anden, como nun pue ser d’otra forma, a polo que-yos da perres, y sabíen qu’abondos llectores dexaríemos quedar esa vocecina que nos diz al escuchu “¡blasfemia, blasfemia!” y acabaríemos mercando una hestoria tan llamadera.
Enantes de nada, vamos resumir un poquitín el contestu. Pue paecer complicaducu, pero prométovos que nun fai falta lleer más que Watchmen y saber quiénes son Batman y Superman pa esfrutar d’esti cómic. Nun sé si hai daquién en mundu que nun sepa migaya de los dos superhéroes con más sonadía de DC y, si entovía nun lleisti Watchmen, afálote a dexar agora mesmo esta reseña y dir a mercalu. Coime, fai’l favor, que ye un imprescindible. Un must have, que dicen agora.
El contestu:
En 2011, DC borró la continuidá de tolos sos personaxes pa entamar de nueves. Nun yera la primer vuelta, ye daqué que la compañía fai cada ciertu tiempu pa facilitar la llegada de llectores nuevos, acencellar hestories enguedeyaes y dexar de llau detalles desfasaos. Sí foi, hai dicir, la vegada que más coses borraron. Aficionaos a esgaya fadiaron al alcontrase, de sópitu, con que munches de les sos aventures favorites, inclusive dellos de los sos personaxes favoritos, nunca nun esistieron na continuidá nueva. Como yá ye vezu nesta dómina dixital, cagáronse en too nes redes sociales, y anque la iniciativa tuvo ésitu nun principiu, les ventes foron decayendo cola perda l’arranque. Poro, en 2016 DC espublizó’l cómic DC Universe: Rebirth, nel que s’asoleya que tres d’esos cambeos hebo una mano negra (o, más bien, azul) qu’anda caciplando coles xuntures del universu. Apaecieron personaxes escaecíos tentando de que los sos collacios los recordaren, y dalgunos superhéroes escomenzaron a alcordase de coses que nunca nun-yos pasaron. Y la trama foi avanzando calco fasta que, en 2018, sal el primer númberu de Doomsday Clock, serie curtia na que Geoff Johns y Gary Frank acostacien esplicanos qué narices ocurrió, cruciando’l destín del universu principal de DC col de Watchmen. La serie foi allanzando, y el númberu docenu y postreru nun aportó a les llibreríes fasta 2020.
L’argumentu:
(Ensin desatapamientos gordos nin acullá los númberos primeros.)
Ye 1992 nel mundu de Watchmen,y acaben de revelar la verdá de lo asocedío en 1985 (nun voi dicir qué, nun seya que nun me fixeres casu y teas lleendo esto primero). El mundu ta de nueves al borde del desaniciu, pero Ozymandias tien un plan: Quier atopar al Doctor Manhattan y convencelu pa que salve’l planeta de la autodestrucción. Demientres igua la nave de Night Owl pa viaxar ente dimensiones, un Rorschach nuevu rescata a dos villanos de prisión, y darréu toos cuatro (con un llobín cerval nuevu) viaxen a otru universu en busca de Manhattan.
L’universu al que van ye, cómo non, el de los superhéroes de DC, y al empar tien la so propia tensión internacional: Va poco que se reveló que nos Estaos Xuníos hai mayor densidá de metahumanos qu’en cualesquier otru país porque’l so gobiernu ta creándolos como armes, y tien axentes superpoderosos entrenándose a la vista de toos, faciéndose pasar por héroes y villanos. A les otres potencies nun-yos fai nenguna gracia, y escomienza una carrera armamentística metahumana asemeyada a la nuclear.
Y asina tenemos too tresnao pa entamase porque, como podemos albidrar, los foriatos acabante aportar nun van aposentar les coses.
Crítica:
Ta nidio dende l’entamu que tamos énte un cómic de Watchmen, pueque demasiao. Na primer páxina atopamos un Rorschach nuevu rellatándonos que’l mundu ta a puntu de finar, y la fuxida de prisión que vien dempués recuerda a la del primer Rorschach na hestoria orixinal. Estos aldeos, que siguen dándose a lo llargo la serie, dan la impresión de que Johns garra con della medrana’l cargu de siguir la obra de Moore y Gibbons, polo qu’asegunda los mesmos conceutos p’asegurase de nun la profanar. Pela contra, repetir la cadarma de nueve viñetes por páxina, tan poderosa como reconocible, ye tou un aciertu por parte de Frank.
N’otru orde de coses, Johns tien más tinu cola creación de personaxes nuevos. El segundo Rorschach y, sobre manera, los dos villanos que rescata (Marionette y Mime), resulten personaxes interesantes. Al escomienzu nun sabemos muncho d’ellos, pero más sero hai capítulos dedicaos a cuntanos más. Los personaxes orixinales de Moore y Gibbons vense un poco planos, de nueves porque paez que nun quier metese a tocar lo que nun ye d’él. Colos personaxes clásicos de DC nun tien problema, que ye Geoff Johns y, bultablemente, conozlos de sobra.
A midida que la hestoria avanza, dexa de ser lo que paecía una segunda parte de Watchmen pa ser más bien un macroeventu comiqueru d’esos a los que nos tienen avezaos, de los que nos prometen que van camudar too y yá nada va volver a ser lo mesmo, magar que salen dos o trés al añu y pue resultar que’l viniente desfai too lo qu’asocedió n’anterior. Sicasí, esa natura doble paez xugar al so favor, porque anque nun-y llega a Watchmen a los calcaños (lo que tamién yera d’esperar), como macroeventu ta bastante pencima de la media, revela secretos del multiversu DC y tien consecuencies qu’abulten duraderes. Amás, promete que va haber más hestories colos personaxes creaos de Moore y Gibbons y, sorprendentemente, déxate con ganes de lleeles.
En resultancia, tamos énte una obra que tien aciertos y errores, pero que polo xeneral ta bien fecha y col respetu que riquen los personaxes de dambos dos universos. Podemos esfrutala si sabemos dexar los prexuicios a un llau y entender que, nesti mundu, nun hai nada sagráu. Nin siquiera’l putu Watchmen.
Si quies mercalu, ECC Ediciones espublizólu en castellán en formatu grapa, nos últimos tomos del coleicionable Watchmen y anunció que lo va recopilar nun tomazu pa Xineru de 2021.
