Cuando salió Bird Box, a finales de 2018, foi imposible nun la comparar cola recién A Quiet Place, y hubo hasta quien consideró que yera la copia (o hasta’l mockbuster) de Netflix. Eso ye dalgo que resulta poco creyible, pos pasaron mui pocos meses de diferencia ente una película y otra, arriendes que les dos tán basaes en noveles. Por embargu, yo sí que-y alcuentro un paecíu notable a otra película, The Happening (2008) de M. Night Shyamalan, que sí que sedría inclusive anterior a la novela. A cabu y al cantu, les dos van de que la xente empieza a suicidase en masa y a lo xole, presentándonos un apocalipsis cercanu al zombi pero con un villanu muncho más espantible, un deséu incaltenible. La causa ye bien diferente nuna y n’otra (nun voi dicir cuála, que ye metese en spoilers), pero’l fondu ye bastante’l mesmu.

Por embargu, tampoco pienso que puea considerase una copia, quiciabes una inspiración, y el casu ye que Netflix alcontró con ello un filón que bien pue esplotar con películes y hasta series ambientaes en tolos requexos del mundu. Toi seguru de que, si Bird Box Barcelona tien ésitu pronto van venir Bird Box Seoul, Bird Box London o Bird Box Tokyo.

D’esta llámame una barbaridá’l plantegamientu, que meyor nun voi desvelar porque igual tarden más d’un cuartu d’hora en desvelalu por sorpresa y pienso que ye meyor esfrutalu en persona. Val con dicir que’l protagonista, interpretáu por Mario Casas, nun ye nengún santu, y ye esto, tan radical, lo que fai que la película nun seya una simple copia de la primer entrega. Da-y un aire, diría yo, a adautaciones de manga a live action, cuasi del estilu d’Alice in Bordeland. Yá solo por ver una cosa asina con actores españoles paezme que yá paga la pena la película.

Sí estropia un poco la esperiencia, y ye una pena, un metraxe escesivu, pelo menos pal mio gustu, y ye qu’anque nun llega a les dos hores (en tiempos nos que ye normal sacar películes de dos hores y media, lo que me paez un fedor) hai un momentu nel que la cosa resulta allargada por demás. Pa min, la verdá, ye meyor qu’una película nun llegue a la hora y media. Nun ayuda, tampoco, que’l plantegamientu vaya volviéndose más convencional según avanza la trama, lo que, anque pue ser predicible, -y quita la fuercia a eso que me prestara tanto.

En resume, ye una película entretenida, sobre manera si la comparamos colo que sal últimamente na plataforma, y da-y unos puntos estra que s’ambiente en Barcelona, con actores bien conocíos pequí, y el plantegamientu del que falaba. La orixinalidá piérdese pel camín, pero tampoco hai que filar delgao.

Leave a Reply

La to direición de corréu nun va espublizase. Los campos riquíos márquense con *