Black Mirror ye una serie de lo más interesante, y (sacantes dellos episodios, que son escepciones más allegres) ye por esa capacidá que tien de ver el llau más terrible de lo que nos traen les tecnoloxíes nueves. El poder d’atracción que tien ye’l de lo perturbadora que resulta, porque vemos nes hestories que nos presenten coses que reconocemos del mundu real… o tamién del hiperreal que nos prometen como panacea.

Por embargu, resulta que nesta sesta temporada, depués de tener d’esperar unos cuantos años pa ella, ye bien llamadero que paez querer llevanos per otros requexos de la mente, esperimentando un poco pero ensin perder la esencia… Y lo que más llama ye que los dos primeros episodios critiquen de manera bastante evidente les plataformes de streaming, parodiando col nome de “Streamberry” la mesma canal qu’emite la serie, Netflix (con fonte y soníu idénticos). Otru puntu importante d’esta temporada ye lo difícil que resulta saber per ónde va dir un episodiu hasta qu’avanza un poco, conque ye meyor dicivos que, si nun la vistis y queréis esfrutar/sufrir la esperiencia completa, ye meyor que nun sigáis lleendo a partir d’equí, onde voi desvelar unes cuantes coses.

Nel primer episodiu, Joan Is Awful, tenemos una muyer que lleva una vida bastante del montón. Bono, podríemos xulgala por delles coses, como que se manda mensaxinos col ex mientres el mozu-y fai l’almuerzu, y hasta queda pa velu, o que-y paez que ye una pesada la moza a la que-y mandaron despidir pela mañana y nun acaba d’asumilo. Pero les coses cambien dafechu pa ella cuando llega a casa y pon Streamberry, pa ver qué novedaes hai y embaecer un poco. Y ye qu’atopa una serie na que nada menos que Salma Hayek fai d’ella. Sí, d’ella. Mesmu nome, mesmu pelo, mesmu trabayu… El capítulu reproduz cómo-y foi’l día, cuasi calcáu, pero esaxerando los sos fallos como persona y dexándola peor tovía. Y caldía vuelve a repetise con un capítulu nuevu. Ye imposible nun la reconocer, y de sópitu paez-yos lo peor a tola xente que la arrodia. Perdestrócen-y la vida. Ye por ello que quier denunciar a la plataforma, pero resulta que, cuando firmó los términos y condiciones d’usuariu, ensin lleelos (como toos), dio permisu pa qu’usaren tola información que puen sacar de los sos aparatos electrónicos. Prueba, tamién, a denunciar a Salma Hayek por actuar de manera que la difama, pero resulta que nun ye ella l’actriz… Ye una imaxe fecha por IA a la que namás-y punxeron la cara d’ella. Y asina, Joan vese asediada por un sistema despersonalizáu nel que toos saquen beneficiu a la so costa, y énte’l desesperu idea planes alloriaos colos que llibrase d’esa velea.

Ye, pienso, ún de los meyores episodios de les seis temporaes de la serie, pos anque l’argumentu seya bien surrealista, acaba casando dafechu col espíritu y l’estilu de la serie, sobre manera por como terminen resolviéndose les coses (cosa que nun voi comentar equí, que yá fici bastante spoiler). Ye una traxicomedia que nos apunta col deu, sobre cómo dexamos que les máquines y compañes despersonalizaes nos dirixan la vida hasta cuasi facenos esclavos pal beneficiu d’unos pocos. Nun dexa de ser paradóxicu esti venceyu cola canal na que podemos vela, porque asina tamién nos muestra la nuesa imposibilidá de construyir una alternativa, d’escapar d ‘esta sociedá tan esgonciada.

Per otru llau, Loch Henry tira más a una hestoria de corte bastante realista, na que nun hai ficción científica pel mediu. Podríemos dicir que ye mui como Shut Up and Dance, si recordáis l’episodiu aquél del rapaz obligáu a facer coses porque y ḥackiaron l’ordenador y amenacen con publicalo. Nesti tenemos un aspirante a cineasta que vuelve al pueblu nel que se crió, agora cola moza y col envís de grabar un documental que pinta bastante aburríu. Pero ehí cuénta-y a la pareya por qué’l pueblu ta tan muertu, por qué nun hai turistes, y ye que va años hubo un sicópata que mató de manera terrible un montonáu de persones. La moza, y lo mesmo un amigu colos bolsos al revés que quier atrayer turistes morbosos pa facer reflotar el negociu, convéncenlu pa grabar un documental true crime, d’esos que tán tan de moda. Nun pueo, a partir d’equí, contar más ensin desvelar coses importantes, pero lo que ta claro ye que nun se sabía too al respeutive de los crímenes, y van dir descubriéndolo ellos.

Esti episodiu va directu, tamién, a por una de les mayores controversies de Netflix, que ye’l sensacionalismu col que trata fechos terribles col fin de tener audiencia. Nun ye dalgo propio namás de la canal, claro, esto dase dende va décades y hai casos bien sonaos, pero paez que la plataforma ta llevándolo a más con series como la recién Monster: The Jeffrey Dahmer Story, na que cuenten con demasiaos detalles (y quiciabes con demasiada empatía col protagonista) los sádicos asesinatos que’l sicópata nomáu cometió nos años ochenta (y que, por ser de va poques décades, tovía viven familiares cercanos de les víctimes qu’apaecen na serie). ¿Hasta ónde ta dispuestu a llegar daquién por contar una bona hestoria? ¿Cómo reacciona’l públicu cuando se convierte dalgo tan espantoso nun puru espectáculu? Como dicíemos, esti segundu episodiu adiéntranos, lloñe de la ficción científica, n’otru aspectu d’a lo que nos tán llevando los tiempos posmodernos, nos que tou fechu ta disponible pa convertise en mercancía.

Daba la impresión de que, quiciabes pola espera d’unos cuantos años, y que la escuridá que predicíen abulta tar faciéndose verdá, los creadores de la serie podríen cambiar de perspectiva y mostranos dalgo que nun se reconociera como Black Mirror. Por embargu, ta claro la cosa empieza potente.

Leave a Reply

La to direición de corréu nun va espublizase. Los campos riquíos márquense con *