L’otru día taba yo tou contentu, porque empezara a ver la sesta temporada de Black Mirror y la cosa pintaba estupenda. Conque, teniendo yá bastante que dicir nun articulín con namás contar lo que me paecieron los dos primeros episodios, púnxime al llabor ensiguida. De fechu, primero de lleer la de los otros trés, que ye la que vien darréu, podéis ver la d’esos calcando equí. El tonu optimista de la reseña ye evidente, falando de que nun perdieren el toque, y… mamina, qué equivocáu taba.
El tercer episodiu, Beyond the Sea, ta guapu. Nun ye’l meyor de la serie, y ye tan llargu qu’ensin problema podría ser una película independiente, pero la verdá que nun tengo más quexa. Nél tenemos de protagonistes a Aaron Paul y Josh Hartnett (tamién a Kate Mara, pero nun me vien bien pa contar agora la sinopsis), dos astronautes que, mientres tán de misión, puen conectase a unos androides col so aspectu y que s’alluguen na Tierra, p’asina siguir llevando vida normal coles families cuando nun tienen xera (davezu atender dalguna avería urxente). Primero de nada, prestaríame comentar una crítica que veo muncho pehí, que ye que bien podríen tener los androides na nave y tar ellos en casa. Y ye que, ocúrreseme, si una de les averíes impidiera la conexón, con esa opción la nave diríase de xuru al carayu.
Bono, el casu ye qu’hai xente na Tierra a la qu’aquello nun-y paez mui normal, porque tamos nun mundu que por moda, valores y teunoloxía (non fantástica) recuerda al de la carrera espacial de los años sesenta (cómo casa esto col restu de capítulos de la serie, yá que se supón que toos asoceden nel mesmu mundu, ye lo que más me rincha a min). Y, un día, una especie de Charles Manson cólase con esbirros en casa del personaxe de Hartnett, cosa que nun va acabar bien pa él nin pa la so réplica mecánica. A partir d’equí, el capítulu céntrase na rellación de los dos astronautes, y en cómo l’otru empieza a empresta-y la so réplica pa dar paseínos y eses coses. Prestaríame contar más, pero yá ye demasiao.
Sacante esa anacronía que nun permite (o pelo menos fai difícil) asitiar l’episodiu na cronoloxía de la serie, ye interesante y tien toles traces de ser ún más de Black Mirror, anque de los que menos conexón tienen col mundu real y les posibilidaes más siniestres que permiten los nuevos dispositivos tecnolóxicos.
La mio quexa nun vien d’esti capítulu. Sedría ún más, igual un poco reguleru, pero como yá había otros cuantos. El casu ye lo que vien depués. Mazey Day y Demon 79, nun son episodios de Black Mirror. Daquién equivocóse y metiólos en Netflix onde nun los había que meter, son d’otra serie y tracamundiáronlos. Y nun entro yá en si son bonos o malos, porque ye tan ofensivo lo que faen que nun paga la pena. Son otra cosa. Son episodios sueltos de The Twilight Zone o The Outer Limits, una antoloxía de fantasía y horror que nun tien lo más mínimo que ver col filu conductor de la serie. Porque esta nun va de monstruos nin d’artiluxos malditos. Va, como dicía enantes, de les posibilidaes más siniestres que nos trayen les nueves tecnoloxíes. Son ficción científica. Y metiendo estos episodios como parte de la serie tan riéndose de nós. Llevo un cabréu importante y nun tengo más que dicir al respective.
