Va munchos años yá d’aquel espantu que ficieron nos noventa, una película d’aición real que yera pa guardar en caxón y echar la llave. Si nun la vistis, por favor, nun la busquéis. Más tiempu tovía dende la serie aquella qu’echaben peles mañanes, y mecía a lo xole imáxenes d’actores de sitcom y dibuxos. La verdá que, como pasó muncho colos videoxuegos, había daqué na saga de Super Mario Bros. que nun dexaba que ficieren dalgo decente con ella. Bono, al cabu y al cantu, igual yera too demasiao alloriao como pa da-y un bon filu argumental, ¿non?

Pos la verdá que non, y esta película ye muestra d’ello. Nun ye, vamos dicilo yá de mano, una obra maestra del séptimu arte. Tampoco ye eso. Nun va pasar a la historia del cine, lo más seguro. Pero con ella dan a la saga, por fin, una película al altor que merecíen unos personaxes tan populares. Una animación bien espresiva, un argumentu que pelo menos ye pasable, un montonáu cuasi incontable de chistes “meta” que van prestar pola vida a los aficionaos a los videoxuegos… y un cantar graciosísimu y pegadizu de Jack Black (Bowser) que, esti sí, va pasar a la historia. Peaches, peaches, peaches, peaches, peaches…

Perdón.

Volviendo al tema, rínchame un poco aquello de que Mario y Luigi seyan unos fontaneros de Nueva York que caen per una tuberia misteriosa (sicasí, ye lo que yá tienen fecho n’otres versiones) porque ente otros xugué a Super Mario World 2 y ehí queda bien documentáu que viven nel Reinu Xampiñón desque los llevó la cigüeña siendo ñácaros. Sí, llamáime repunante… soilo. Pero’l recursu d’usar dos mundos (en plan, digamos, El País de les Maraviyes o Stranger Things) ye una bona manera, he reconocer, de presentanos tou esi mundu de paranoya al empar que lu descubren los protagonistes. Y asina, la película nun tarda en convertise nun desfile de referencies a los videoxuegos (monstruos, items, el mesmu manexu…) que quiciabes nun pillen los que nun tienen xugao, pero a los que de xuru que-yos va paecer un derroche d’imaxinación como pocos tienen visto. Lo más llamadero, pa los aficionaos, ye que, siendo tantísimos los xuegos, hai coses a esgaya que queden en tinteru, conque tienen material de reserva pa facer otres milenta películes ensin problema.

Como dicía, tampoco ye la meyor película del mundu. Pero ye entretanida, graciosa, y tolos personaxes importantes brillen en dalgún momentu; amás de los hermanos, Peach, Toad, Donkey Kong y, sobre manera, Bowser, tán dotaos d’una personalidá y espresividá que los fai especiales. Poner actores nomaos a les voces paez ser tou un aciertu… Anque equí, aclariemos una cos. Esto nun ye, como dalguna vegada se comparó, poner famosos a doblar mal que bien como depués suelen facer en castellanu, porque pa l’animación orixinal graben primero les voces y, depués, animen los personaxes según lo que ficieron los actores. El trabayu de doblaxe, que ye distinto, pa los actores de doblaxe.

Y tres d’esti manifiestu, termino, que nun ye plan de contavos la película entera.

Si nun vistis la película y queréis ver l’avance, dexámosvoslu calcando equí.

Leave a Reply

La to direición de corréu nun va espublizase. Los campos riquíos márquense con *