Talamente como vos contábemos ayeri pola mor de la salida de Contra: Operation Galuga, va unos díes sacaron un Nintendo Direct nel qu’anunciaben una montonera de novedaes. Munches d’elles, quiciabes pola acabante sacar del fornu película de Super Mario Bros., son de personaxes d’esti universu tan peculiar. Conque, ensin más que dicir al respective, vamos contavos que xuegos vienen del fontaneru italianu y amigos:
Super Mario RPG
Pueque nun lo recordéis, pero yá tuvimos ún d’estos pa SNES. Con Mario de protagonista, y tamién otros munchos elementos del xuegu orixinal, sí cambiaba radicalmente de xéneru pa presentanos un xuegu de rol d’estilu xaponés, con combates a turnos, provisiones d’oxetos y toes eses coses tan típiques. Sálennos agora con esta versión nueva que claramente ye un remake (podéis ver l’avance calcando equí) pero mui ameyoráu en gráficos y pal que nos prometen unes cuantes novedaes. Sal yá en nada, el diecisiete de payares.
Princess Peach: Showtime!
Tamién tuvimos nel so momentu un xuegu de la Princesa Piescu, en concreto ún pa Nintendo DS. Yera mui clásicu no que respecta al xéneru, un xuegu de plataformes de tola vida. Agora va salir ún que paez tener muncha entidá propia, pos va facenos viaxar pelo que paecen distintos xéneros y cola princesa faciendo de pirata, detective y hasta karateca. Sal a la venta’l ventidós de marzu de 2024, y podéis ver l’avance calcando equí.
Mario Vs. Donkey Kong
La primer apaición de Mario foi nun xuegu de Donkey Kong, dalgo qu’homenaxaron na película y qu’agora recuperen pa esti xuegu. Nél mecen la idea orixinal d’evitar los ataques de Donkey Kong col enfrentamientu a cosadielles qu’hemos resolver pa pasar de fase. Sal el dieciséis de febreru de 2024, y tenéis l’avance equí.
WarioWare: Move It!
La versión malvada de Mario fízose un güecu importante nes plataformes de Nintendo con estes coleiciones de microxuegos, que tán prestosos sobre manera pa echar unes partíes con familia o amigos como si fueren xuegos de mesa. Esta entrega nueva sal el trés de payares, colo que pue ser una bona manera de pasar les navidaes. Dexámosvos l’avance equí.
Luigi’s Mansion 2 HD
Nesti casu tamos énte’l videoxuegu clásicu de 2013, pero con un remocique que lu pue facer atrayible pa los señardosos y les xeneraciones nueves. Pa esti hai qu’esperar hasta’l branu que vien, pero como de toos dexámosvos l’avance equí.
