Va yá dalgo más d’un añu qu’Amazon compró la histórica Metro Goldwyn Meyer por nada menos qu’ocho mil cuatrocientos cincuenta millones de dólares, lo que-y dio accesu a tol so catálogu (más de cuatro mil películes) y a los drechos pa siguir con franquicies nomaes como les de James Bond, Rocky/Creed o Robocop. Por embargu, yera dalgo de lo que nun víemos qu’hubiera munchu aprovechamientu… hasta agora.
El portal Deadline (podéis ver la noticia orixinal calcando equí) anuncia qu’Amazon ta desendolcando como una docena de proyeutos basaos nes franquicies de MGM, yá seya como series o películes. D’esta manera, hai trés sagues que consideren que tienen un potencial especial sobre les demás, talu que tán pensando en facer d’elles tanto una serie como una película. Estes son:
–Robocop, que, por si acabáis de venir d’otru planeta, yera’l policía cyborg que s’enfrentaba a punquis y empresarios malvaos, y que se fizo famosu na triloxía de películes de los ochenta y noventa pa dempués pasar a videoxuegos, dibuxos, noveles, cómics y hasta un remake que nun trunfó demasiao.
–Stargate, película de viaxes interplanetarios y seudodioses exipcios, tamién de los noventa y que, más tarde, tien dao llugar a unes cuantes series (Stargate SG1, Stargate Atlantis, Stargate Infinity, Stargate Universe, Stargate Origins). D’esta fálase más de facer un remake qu’una continuación.
–Legally Blonde, que, si nun vos suena porque ye probable que tea un poco lloñe de los gustos de los nuesos llectores, foron dos películes con Reese Witherspoon faciendo de señoritinga (pero mui señoritinga) pero que tenía bon corazón y facía’l bien como abogada. La segunda película acabábala cola intención de presentase a presidenta de los EE.UU., conque nun sedría raro que fuera pehí la cosa.
Y arriendes de too esto, que son los proyeutos más ambiciosos, tamién se fala d’una continuación de The Thoman Crown Affair, aquella de Pierce Brosnan faciendo de lladrón de guante blancu; The Pink Panther, Poltergeist, The Magnificent Seven, Fame, Barbershop y un universu con delles obres ambientaes nel mundu de Rocky y Creed.
¡Agarráivos!
