Lleguen novedaes del videoxuegu que tán preparando del míticu RoboCop. Y ye que, por si nun lo sabíeis, l’estudiu polacu Teyon Games lleva tiempu trabayando nuna adautación del superpolicía cyborg al décimu arte. Y nun ye yá que vaya ser fiel a la versión orixinal, tanto na estética como nel espíritu, ye qu’hasta cuenten col actor orixinal, Peter Weller, pa pone-y la voz al personaxe. Lo único malo ye que, anque s’esperaba que RoboCop: Rogue City saliera yá pa xunu, pa PC, PlayStation 5 y Xbox Series X|S, agora cuenten que va retrasase un pocoñín y nun vamos tenelo hasta setiembre. P’aselar un poco la nagua, eso sí, asoleyaron un gameplay na Nacon Connect que podéis ver calcando equí, y que ta ambientáu nuna cosa tan de la época como una sala recreatives. Y si preferís un vidéu con cinemátiques y eses coses, ta tamién esti de va tiempu.
RoboCop, por si venís d’otru planeta y nun vos enterastis tovía, ye una famosa saga de películes de ciencia-ficción d’ambientación cyberpunk, de la que tamién tienen sacao series de televisión d’animación y aición real, cómics (incluyendo un crossover con Terminator), videoxuegos y un remake de 2014 que nun tuvo munchu ésitu, nin ente la crítica nin ente’l públicu. Va años que ta falándose d’una película nueva que siguiría la historia de la película orixinal, pero dellos motivos van retrasándola y dexándola nel llimbu. L’ésitu del xuegu fadría d’esta una ocasión estupenda pa qu’arrancaren el proyeutu.
