Route 96 ye un videoxuegu con un plantegamientu mui interesante: El xugador ta nun país (que s’asemeya muncho paisaxísticamente a los EEXX) que ta contrláu por un presidente mui autoritariu (nun ye esautamente un dictador, porque vense carteles de la oposición) y nel qu’hai un grupu terrorista que fai atentaos escontra esti réxime tan autoritariu. Pente medies, una cantidá descomanada d’adolescentes que fai lo posible por escapar del país: per carretera, andando, n’auto-stop, o pagando’l billete del autobús; van facer toos lo posible por salir del so país.
La BSO: lo meyor
Lo meyor, amás de los paisaxes ye claramente la banda sonora, una montonera de canciones bien escoyíes y que faen de la inmersión una realidá.
Ye en verdá una maraviya de banda sonora orixinal.
Procedural
Sicasí, anque la BSO seya lo meyor; lo más interesante que tien esti xuegu ye’l mou de xenerar histories de manera procedural. Esto ye, en cuenta de facer como n’otros videoxuegos de “escueye la to aventura”, onde llegamos al llugar 1 y tenemos la opción A, B y C y depués vamos al llugar 2 ó pal 3 en función de la escoyeta, equí ye distinto dafechu. De mano, porque nun entamamos siempre nel llugar 1, sinón que mos ponemos nel pelleyu d’unos cuantos mozos y moces que tán faciendo por escapar del país. Amás, lo que pasa nun xuegu tien depués repercusión nes siguientes veces que xugamos: Por exemplu, col primer adolescente qu’empobinamos a la frontera, ayudamos a un rapacín a montar un videoxuegu. Más sero, n’otra hestoria, esti videoxuegu yera tema de conversación nes radios y falábase d’él.
Dende llueu, ye una cosa mui interesante’l desendolcu procedural, y faise bastante bien polo xeneral. Nun “rincha” y ye dalgo natural. Anque finalmente, ye verdá, hai una serie d’escenes o situaciones que se repiten nos xuegos de caún (anque nun seya n’orde) como nun podría ser otra manera – tamos énte un videoxuegu d’aventures, y non d’un universu abiertu.
Innecesariamente frustrante
Con too, el videoxuegu pue ser mui frustrante. A diferencia d’otros videoxuegos d’escueye la to aventura onde nun hai “bien” y “mal” sinón consecuencies distintes, lo cierto ye qu’en Road 96 podemos “ganar” o “perder” la partida en cuestión; según el nuesu adolescente llegue a la Frontera y marche del país o lu acaben matando (ye ún de los finales posibles) o metiendo na cárcel (otru más). Nestes ocasiones da rabia nun tener la posibilidá de “cargar la partida” sinón que nun mos queda otra que volver a entamar de cero otra vez. Amás, pa complicalo más, en delles ocasiones el xuegu pon una cuenta atrás pa que faigamos una aición, metiendo un elementu d’estrés no qu’habría ser un xuegu d’aventura. Por facer la comparanza, ye como si a metá de la llectura d’una novela, tuviéremos que ponenos a facer flexiones o a saltar mui alto. Nun ye dalgo qu’un xuegu d’estes carauterístiques pida y ye daqué que na nuesa opinión sóbra-y.
Con too, anque frustrante, Road 96 tien los ingredientes pa ser un xuegu que merez la pena probar, anque namás seya poles hestories distintes y la BSO.
