La canal de la estrella de cine Ryan Reynolds, Maximun Effort, anuncia embarcase en dos proyeutos bien llamaderos.
Ún, el que de xuru ye más reconocible pa la mayoría de los nuesos llectores, ye la vuelta d’ALF, l’estraterrestrín aquel con gustu por comer gatos. Reynolds diz tar namoráu de la serie dende neñu, y ye por ello que se fizo cola llicencia pa trayela de vuelta (lo que yá ta faciendo n’anuncios como esti mientres prepara la serie). Si daquién ye mui mozu pa saber d’ella, dicir qu’ALF (Alien Life Form) foi una sitcom, estrenada en 1986, que trataba d’un estraterrestre baxín y pelosu que tenía d’escondese en casa d’una familia tres estrellase na Tierra. Tuvo tantu ésitu que salió tamién una serie d’animación, y el final bruscu (y dél traumáticu pa los más pequeños de la casa), nel que los militares lu descubríen y llevaben a un llugar desconocíu, obligó a facer una película na qu’esplicaren qué-y ocurriera al probe marcianu na base militar. La popularidá de la serie marcó época, y otres series copiaron la fórmula con ésitu (como foi’l casu de Harry and the Hendersons, col mesmu argumentu de “familia escuende monstruu” pero cambiando l’estraterrestre por un piesón).
Per otru llau, y que bien pue prestar a los millennials pol recuerdu que provoca, l’otru proyeutu ye la vuelta de la clásica serie d’animación de los noventa (masque dacuando da la impresión de qu’escaecida) Biker Mice from Mars (dexámosvos equí l’abertura de la serie, por si nun acabáis de decatavos). Esti llocurón de serie de nome tan esplícitu, yá que trataba sobre unos mures humanoides (y con antenes) que veníen de Marte montaos en moto y, equí, facíen de vixilantes xusticieros (un poco a lo Ninja Turtles o les posteriores Gargoyles o Street Sharks), foi un ésitu ente 1993 y 1996. Hubo un intentu de rellanzar la serie en 2006, que nun acabó bien, pero agora la canal de Reynolds quier estrenase nel terrén de l’animación cola so vuelta.
Tovía nun tenemos feches nin imáxenes promocionales d’estes series que vienen, pero por supuestu vamos contavos en cuantes que les haya.
