Güei trayémosvos a Refuelgu una curiosidá como poques, y ye que nel universu espandíu de Star Wars hai un sistema solar con nomes que van resultavos de lo más llamaderos.
Too empieza, pa ponevos un poco en contestu, cuando’l guionista de cómics británicu Ian Edginton visitó’l Salón del Cómic d’Avilés. Debió presta-y el sitiu, porque dempués d’eso decidió facenos un homenaxe nun cómic de Star Wars qu’escribió. En Star Wars Tales #22 preséntanos una hestoria que nun va dexavos indiferentes: nella apaez la estrella “Aviles”, alredor de la que xira’l planeta Aviles Prime… Y, como satélite d’esti, tenemos la lluna-fábrica llamada Asturias. Pero ye qu’eso nun ye too.
Mientres les Guerres Clon, el Conceyu Jedi manda a un comandu escoltar la nave de Lorca Oviedo, direutor xeneral de la fábrica d’armes Inxeniería Oviedo, pero una nave droide ataca a Lorca y estréllase n’Asturias. Ehí, por supuestu, van enfrentase clones y droides, con tiros a esgaya, amás de descubrise que’l Direutor Oviedo ye un traidor… La verdá que tien una aición bastante movida pa una hestorietina de ventidós páxines. Y, como sabemos que sois un poco incrédulos, dexámosvos con un par d’elles, pa que veáis que nun tamos inventándolo too. Ye una pena que Disney se cargara l’universu estendíu… anque, como ta reciclando dalgún de los sos conceutos, igual un día vuelven, ¡esperemos que colos nomes n’asturianu!
