Cuerre’l rumor, caldía más fuerte en redes, de que l’Universu Cinemáticu Marvel va tener un villanu nuevu, ún de los más poderosos nos cómics y que ta yá pa pasar a la gran pantalla… Bono, igual nun tan grande, la pantalla, depende de lo que tengáis en casa, porque lo que se cuenta ye que tán preparándo-y un especial d’horror, al estilu del de Werewolf by Night, pa la próxima Viéspora de Tolos Santos. Y puesto que yá vos dimos el nome del actor que se ruxe, y tamién el de pa qué, solo falta dicir de quién va facer. Conque, en dando esta atmósfera de misteriu, respondemos a: ¿cuálu ye esti villanu?
Pos nin más nin menos que’l Señor de la Escuridá, Mephisto. Y, si nun vos suena’l nome, pue resumise en que ye’l Satán del Universu Marvel.
Presentáu la primer vegada nun cómic de Silver Surfer (de Stan Lee y John Buscema), ye un demoñu qu’intenta corromper una alma tan pura como la del heroe platiáu. Ensin consiguilo, claro. Pero, dende entós ye lo que tien fecho n’incontables series a incontables personaxes, convirtiéndose nun de los grandes villanos del Universu Marvel. Tuvo un papel bien importante, por casu, na Infinity War de los cómics, y ye l’axente culpable del polémicu “descasamientu” de Spider-Man y Mary Jane, al facer un tratu con Peter de que salvaría la vida a la tía May si, empara, borraba’l so matrimoniu de la historia.
Y agora, polo que se ve, Mephisto va llegar tamién al Universu Cinematográficu nel pelleyu de Sacha Baron Cohen, l’actor conocíu poles sos comedies irreverentes. Como dicíemos, les noticies apunten a que lu presentaríen nun especial pa la Viéspora de Tolos Santos, y taríen agora mesmo rodándolu nel set de la pondera de Wandavision, protagonizada por Kathryn Hahn, Agatha: House of Darkness. Repetimos, nun ye dalgo que tea confirmao, pero que sí tán dando como verdadero importantes portales internacionales.
Vós, ¿veis esti actor cómicu nel papel, o quiciabes vos paez que-y quitaría seriedá? ¿Adautaríase’l papel al actor, o l’actor al papel? Podéis comentanos lo que vos paez.