Sailor Moon (en xaponés orixinal, Bishōjo Senshi Sērā Mūn) nació como un manga de l’autora Takeuchi Naoko en 1991, y namás pasaron unos meses hasta qu’escomenzaron una adautación a serie d’animación que s’emitió en tol mundu que foi a marcar una xeneración entera, especialmente de neñes. Y ye que les protagonistes yeren un llamaderu grupu de superheroínes adolescentes con uniforme escolar y poderes místicos (mahō shōjo o moces máxiques, que ye como se llama’l soxéneru) a les que Takeuchi dio un tonu bultable veníu de les series sentai (más conocíes n’Occidente como Power Rangers, y en xeneral más dirixíes al públicu masculino). Esta foi una fórmula “máxica” (nunca meyor dicho) cola que se ficieron un gran güecu nos corazones millennials… Tan grande, de fechu, que nun se podríen entender n’absoluto otros fenómenos d’ésitu mundial ensin esta serie, como sedría un exemplu The Powerpuff Girls.
El casu ye que la serie tuvo cinco temporaes (doscientos episodios en total), y más tarde estrenaron tamién delles películes, hasta una serie d’aición real y tamién un remake curtiu en 2014. Pero ye agora, en 2023, cuando va salir por fin una continuación direuta de la serie que va funcionar, según cuenten los creadores, como una quinta temporada. La primera, Pretty Guardian Sailor Moon Cosmos: The Movie, estrénase mañana mesmo en Xapón, y la segunda namás trés selmanes depués.
Sobre l’argumentu, podemos contavo que les Sailor Guardians han unise a les Sailor Starlights (les sos equivalentes d’un sistema solar estintu, y que na identidá secreta son mozos) pa vencer a Sailor Galaxy, otra guardia qu’acabó volviéndose permalvada (anque a la final de la serie consiguía remise).
A la espera de saber cómo y ónde s’estrenarán les películes equí, dexámosvos l’avance de Sailor Moon Cosmos calcando equí, pa que vos vaya metiendo les ganes.
