La productora Hanna-Barbera creó en 1969 una de les sos franquicies más potentes, una que sigue eternamente de moda mentanto les más de les sos creaciones cayeron nel escaezu. Esta ye Scooby-Doo, que gocia tovía d’una popularidá tremenda; prueba d’ello ye que tovía anguaño siguen saliendo series, cómics y películes d’animación cuasi tolos años. La última serie, Velma, ye una reinvención un poco alloñada de la idea orixinal, ente otres coses al enfocase más bien nel públicu adultu, pero magar les crítiques que ta recibiendo yá tien una segunda temporada confirmada.
Al respective de los cómics, va tiempu que DC saca crossovers de Scooby-Doo y los sos amigos investigadores con superhéroes de la compaña, teniendo un especial gustu por axuntalu col más popular de toos, Batman. De fechu, ficiéronlos los alcontradizos tamién nuna película de 2018, Scooby-Doo & Batman: The Brave and the Bold, no que ta volviéndose una tradición d’axuntar al famosu perru con otres estrelles, como son el grupu Kiss, los lluchadores de la WWE o Courage, the Cowardly Dog (en castellanu, Agallas el perro cobarde). Agora dan un pasu más nesti entemez imposible con Scooby-Doo! and Krypto, Too!, película acabante salir del fornu y na que La Máquina del Misteriu viaxa a la ciudá de Superman. Y ellí, cola ayuda de Krypto’l Superperru (que tamién tuvo una película apocayá l’añu pasáu), Lois Lane y otros amigos, van tener d’enfrentase a una bona galería de villanos del Universu DC, tando a la cabeza Lex Luthor y… por supuestu, el so perru tamién.
Dexámosvos l’avance d’esta idea tan esparatada calcando equí, que de xuru que va prestar a los más neños y, tamién, a los fans adultos de Scooby, que la verdá que nun son pocos.
