The Pokemon Company trainos la primer serie de televisión basada na franquicia de videoxuegos… Por embargu, nun ye una serie al usu, como imaxinaríamos cuando escuchamos que van facer dalgo asina. PokeTsume, que ye como se llama, tien los pokemons como parte fundamental de la trama… pero en tanto que personaxes d’un videoxuegu.
Y ye que la serie ye un dorama (esto ye, una serie d’acción real y ensin efectos especiales), na que la protagonista, Agaki Madoka, ye una moza de pueblu que tres graduase finca en Tokio pa trabayar nuna axencia de publicidá. La vida nun-y va tan bien como esperaba. Pero ente unes coses y otres, recibe un paquete de so ma, nel que s’alluguen la Game Boy a la que daba de neña y el videoxuegu orixinal de Pokemon (concretamente, la versión colorada). Y asina, enganchada a la maquinina pola señardá que-y provoca’l xuegu, esti va adulces cambiándo-y la vida, pos gracies a él ye a ver el mundu dende los güeyos de cuando yera pequeña.
Esta serie estrénase en Xapón el xueves diecinueve d’ochobre, lo malo ye que de momentu nun sabemos si va llegar equí o, pela contra, va ser otra de les munches series xaponeses a les que nun vemos el pelo, yá que les d’acción real nun suelen tener tantu fandom como los anime.
Mientres esperamos a ver qué pasa, dexámosvos l’avance de la serie calcando equí, seguros de que si tamién xugastis al Pokemon orixinal va removevos dalgo dientro.
A lo último, apuntar que quiciabes ta empezándose a enxendrar un soxéneru nuevu basáu na señardá polos xuegos de la infancia, amestándose esta serie a otros productos como Destroy All Humankind. They Can’t Be Regenerated, un manga que Panini va publicar pronto en castellanu y que ta ambientáu a finales de los años noventa, y que nos presenta una hestoria romántica con partíes del popular Magic: The Gathering como tresfondu.
