La lliteratura asturiana y el cine paez que ye un poco como l’agua y l’aceite. Anque teamos viviendo una dómina na qu’hai series gallegues que trunfen en Netflix (y otres munches que, de mou más modestu tán na TVG col so “share” particular); lo cierto ye que na TPA nun paez qu’heba voluntá de crear conteníu de ficción d’estes carauterístiques. Ensin esti motor, ye difícil (anque non imposible) que nengún creador asturianu pueda llevar les creaciones a la gran pantalla (o a la pequeña, si nun hai otra).
La incapacidá de llevar la lliteratura al cine nun afeuta namás a la lliteratura asturiana. Tamién a la lliteratura castellana fecha n’Asturies. Nun hai nengún llibru asturianu o fechu n’Asturies que tea agora na pequeña o na gran pantalla. Por eso, nesti artículu vamos facer un repasín de series que taría guapo ver… …pero que la falta de voluntá nun lo permite.
Series asturianes qu’en sin ser de ciencia ficción, son ciencia ficción
Añada pa un güeyu muertu (Dibuxos animaos): Una historia d’unos guaḥes qu’un día prenden la televisión y ven apaecer en casa personaxes de les estremaes cadenes. Nun tendría por qué ser tan gore como na novela orixinal d’Adolfo Camilo Díaz, pero bien valía una adautación…
Potestas (Serie histórica): ¿Vikings n’Asturies? Daqué asina diba ser Potestas, l’Obispu Pelayu, Doña Urraca, Gonzalo Pelaiz… y tolos nobles y siervos de la dómina nuna serie de batalles, faldes y traiciones. P’ameyoralo tovía más, facer como Vikings, onde cuando daquién fala en francés, failo al xeitu medieval. El llibru de Xulio Arbesú merezlo.
Los crímenes de Pumarín (Policiaca): Un Thriller d’esos de tar en tensión y onde hai xiros de guión inesperaos ye no que podía convertise Crímenes de Pumarín. Rodaxe fácil (ta ambientada na actualidá) y inversión pequeña. Podía ser una escelente idea p’adautar y facer una versión ameyorada de Sherlock o de “CSI: Uviéu”
Cuentos de ser y tar (Capítulos independientes): Los cuentos de ser y tar de Laura Marcos merecíen (munchos d’ellos) una bona adautación al cine. Nesti casu, pola so propia estructura, lo que más diba pagar la pena yera una serie na que los capítulos seyan independientes como pue ser por casu Black Mirror.
