Sí, les series tán de moda. Y sí, nunca nun se vieron más series que nos últimos años pero… ¿Y qué hai de los últimos díes? Si hai dalgún momentu na vida pa entamar una serie y vela d’arriba abaxo esti momentu ye la cuarentena. Por eso, en Refuelgu quiximos apurrivos delles idees de series que podéis ver esta cuarentena y contámosvos un poco de qué van y por qué paguen la pena (o non) ensin facer spoiler, claro.
The Mandalorian: El Western espacial “de verdá”
Un datu que llama l’atención ye que cuando salió la primer película de Star Wars nos cines, tovía había pena de muerte en Francia (Quitaríala Mitterrand en 1981); esto damos una idea de lo innovador que podía resultar daquella ver na gran pantalla naves espaciales, criatures alieníxenes, robots, espades láser… Taba claro que dalgo asina suponía un puntu d’inflexón na historia del Cine y de la Ciencia Ficción. Al xéneru llamáronlu “Space Opera” pero hai quien sostién que les primeres películes de Star Wars teníen muncho más de “Western Spacial” (Pensái sinón na manera na que vistía y se comportaba Han Solo).
Por desgracia, l’universu Star Wars que tanto innovare no musical y no estético, acabó siendo un remake eternu de sigo mesmu que munchos acababen aplaudiendo “porque ye Star Wars” y cada vez más víen con daqué d’escepticismu. The Mandalorian non. The Mandalorian llévanos a esi primer star wars, a esi ambiente del desiertu, de la frontera, del Western. A eses histories que mos emocionaben nel cine o na televisión de neños y que recuperen esi ambiente primeru. The Mandalorian ye un western. Un western espacial, sí; pero un western. Yelo no estético, yelo nel guión y yelo tamién no musical. Si te presten los westerns, va prestate ésti.
BONUS TRACK: Llámenlu “Baby Yoda” pero en realidá paez ser que nun tien nada que ver col Yoda que conocimos. Ye namás una criatura de la mesma raza y a la xente paez-y de lo más guapo.
Room 104: Una de les propuestes más orixinales nun cuartu d’un hotel
Room 104, cuartu 104, fainos pensar d’un mou o d’otru nel famosu cuartu 104 de 1984 d’Orwell. Nun tien muncha rellación pero tien dalgo: El poder esclucar la vida de los demás y asomanos a hestories privaes que se desendolquen dientro d’un cuartu d’un hotel. La propuesta de Room 104 ye de lo más interesante. ¿Cuála ye la hestoria? Nenguna. ¿Cuálos son los personaxes? Cada episodiu unos distintos. ¿Cuálu ye’l filu conductor? Un cuartu d’un hotel, el cuartu 104. En cada episodiu asistimos a una hestoria que tien el cuartu 104 como escenariu. Hestories de toa triba: de mozos que descubren la homosexualidá, de crimes, d’amor, de coses rares, paranormales… Práuticamente de too y muncho más de lo que podamos imaxinar.
Ta claro qu’hai episodios de la serie que nun son bonos (pero son muncho menos que los sublimes y aceutables); pero’l conxuntu de (pel momentu) trés temporaes que tien Room 104 paga la pena. Amás, son capítulos curtios que se puen ver rápido y que tienen una variedá que recuerda en gran midida a propuestes na que’l filu conductor nun son los personaxes como ye’l casu, por exemplu, de Black Mirror. Ye ablucante’l xuegu que da un únicu cuartu d’un hotel.
Mindhunter: Sicoloxía criminal nos años 70
Mindhunter ye otra propuesta interesante pa ver nesta cuarentena. Trátase d’una serie ambientada nos años 70 (y onde los decoraos y vestuarios tán mui bien fechos) y ponnos tres de los pasos d’un axente del FBI que trabaya na seición d’estudiu de la conducta criminal. Llévanos a un momentu en que la ciencia criminalística taba lluchando por entender el procesu mental que faen los asesinos, específicamente’l d’aquellos que fixeren los crimes más duros y horribles. Estes hestories lleven al protagonista a visitar a dellos de los criminales más famosos del momentu y a entrevistase con ellos, onde vamos poder dir esplorando la inestabilidá de les mentes criminales al tiempu qu’afondamos na llucha interna dientro del FBI d’esti axente y de los sos collacios por defender la disciplina y facer qu’heba un enfoque más universitariu y científicu-sicolóxicu p’hacia’l comportamientu criminal.
Globalmente la serie ye bona y entretenida, anque nun ye precisamente una de les que más enganchen.
Line of Duty: El meyor guión, de lloñe
Si sois de los que pensáis qu’elementos como l’ambientación, l’escenariu, la temática o los actores son coses que “tán bien” pero que nun tienen absolutamente nada que facer al llau de la importancia que tien un guión cola so coherencia narrativa, los sos xiros, los sos personaxes bien fechos. Si pertenecéis a esti grupu de persones, entós la vuesa serie ye Line of Duty. Desplicar de qué ye nun mos lleva a falar d’innovación o d’idees orixinales: Line of Duty ye una serie de policíes, que ta centrada nos casos de corrupción dientro de la policía británica (más concretamente la inglesa) y sigue los pasos del departamentu d’asuntos internos: Policíes investigando a otros policíes.
¿Qué fai especial a la que, perriba, diba poder ser “una serie policiaca más”? El guión y los personaxes. A lo llargo de les estremaes temporaes que formen Line of Duty la serie va consiguiendo coses complicaes enforma: Una hestoria por capítulu (que zarra maxistralmente), que ta enxerta y ye coherente cola hestoria de temporada (que tamién zarra maxistralmente) y qu’al empar formen parte d’una hestoria global que tamién zarra maxistralmente. Amás de la coherencia narrativa y el fuxir de coses que puen ser “espectaculares” pero que tean inconexes col restu d’elementos de la serie; Line of Duty ye a facer coses que nun víemos na televisión dende – quiciabes – les primeres temporaes de Xuegu de Tronos: Xiros de guión inesperaos, personaxes que pensamos que son bonos, depués que son malos, depués que son bonos, depués que son malos… depués nun lo tenemos claro… y cuando echamos la vista atras paeznos too coherente. Line of Duty ye d’eses series que nun se pue ver namás un episodiu; ye adictiva.
BONUS TRACK: Ye una serie británica, tien un formatu d’episodios británicu d’una hora y les temporaes son curties, d’unos cuatro episodios per temporada.
BONUS TRACK 2: La música ye de les d’agarrase al sillón.
The Americans: Pela mañana llevo los neños al cole, pela tarde espío al Pentágonu
The Americans, amás d’inspirar el xuegu de rol asturianu Depués d’Ochobre, ye una serie que ye importante ver. Tien a la escontra’l fechu de qu’anguaño ye bien difícil poder vela en plataformes de pagu, polo que pue ser preciso mercala fora d’elles. ¿Qué ye The Americans? The Americans ye la hestoria d’una familia americana normal de West Virginia: Los padres trabayen nuna axencia de viaxes, los fíos van al colexu, canten a la bandera, toos falen n’inglés, van de campamentos, faen galletes “cookies” pa los vecinos, corten la yerba en xardín, van ver a la güela pal cumpleaños… Vamos, una familia americana normal, de manual salvo por un detalle, ún namás: El pá y la ma son espíes soviéticos.
Y resulta ser que nel garaxe tienen peluques y identidaes fales escondíes, que van col coche a un parking pa cambialu por otru coles matrícules; que s’acuesten con otres persones (y falen d’ello ente ellos) pa consiguir información, recursos y accesu a los puedos de poder de los Estaos Uníos, que falen rusu y nacieron na URSS, los fíos nun saben nada d’esto y la qu’ellos piensen que ye la güela, en realidá ye l’axente “corréu” de los padres.
The Americans llévanos a una realidá “Como los Soprano pero meyor” (pos nun ye tan lenta); na que tamos col corazón nun puñu por ver si van prindalos o non al tiempu que descubrimos cómo ye’l fechu de tener una familia “normal” mientes ún ye espía. Cómo fuxir de la xusticia cuando’l to vecín trabaya nel FBI, cómo construyir identidaes falses y abordar a testigos y “intelligence assets”. Amás, va danos una visión mui fonda de la era Breznev/Reagan de los ochenta.
Battlestar Galactica: ¿Sedríemos humanos colos robots?
Battlestar Galactica, cuatro temporaes, ye la nuesa última propuesta de serie. Equí’l conceutu ye cenciellu: La humanidá nació nun planeta que se llamaba “Kobol”; dexólu y colonizó otros 12 planetes (Les Doce Colonies); estos planetes acabaron faciendo un gobiernu y desendolcando teunoloxía d’intelixencia artificial, faciendo unos robots conscientes de sigo mesmos pa facer que la vida fore más cenciella pa los seres humanos: Los Cylon. Depués, los Cylon rebeláronse, hebo una guerra y un armisticiu… Too eso va más de 40 años. La serie entama, cuarenta años depués d’esi armisticiu cuando los Cylon vienen a les Doce Colonies y acaben con elles a bombazu llimpiu: Muerren millones de seres humanos, y namás queden unos pocos refuxaos nuna nave de guerra mui vieya que se llama “Battlestar Galactica” y nunes poques naves civiles. Too ta perdío, la única esperanza ye atopar el llugar onde ta la “Tribu Númberu 13”, que, según les vieyes escritures, ta nun planeta llamáu “Tierra”.
A diferencia de na primer guerra Cylon-Humanos, nesta segunda guerra los cylons nun son (o non solo) robots metálicos: sinón que foron quién a desendolcar modelos qu’actúen, piensen y son igual que nós… Sonlo, hasta’l puntu de qu’ellos mesmos tán convencíos de ser humanos hasta qu’un bon día, ensin venir a cuentu, “actívense” y entamen a comportase como un Cylon. Esti ye’l decoráu de Battlestar Galactica, un decoráu que-yos sirve a los creadores p’analizar “¿Qué ye ser humanu?”, pa ver cuáles son les llendes de los drechos humanos, pa ver a partir de qué momentu un ser merez derechos, p’analizar qué fadríemos y cómo reaicionaríemos en casos desesperaos. ¿Cómo cambiaría la mentalidá, la política, la relixón… si nel nuesu planeta, d’esmenu, nun quedaren vives más que 50.000 persones? ¿Siguiríemos creyendo nos mesmos dioses? ¿O entamaríemos a creyer nos de los nuesos enemigos, que mos derrotaron y aniquilaron? ¿Aguantaríen les instituciones polítiques, o desendolcaríense otres nueves? ¿Habría xusticia? ¿Qué rol tendríen los militares nuna “guerra permanente”? Éstes y otres munches cuestiones esplórales una serie que, anque tea “antroxada” de ciencia ficción, ye, quiciabes, una de les series más completes y fondes qu’esisten sobre la natura humana.
The West Wing: L’idealismu (que yá nun hai) na política
¿Cansastis de “House of Cards” y de los políticos de Xuegu de Tronos que caguen pa les idees? ¿Fartucastis de ver xente maquiavélico y dañible nes instituciones y nel poder? The West Wing preséntanos a lo llargo de 7 temporaes cómo ye la vida na presidencia americana del demócrata Joshia Bartlet. Más que’l propiu presidente, los protagonistes son los principales asesores que formen parte del gabinete: el xefe de comunicación, la secretaria de prensa, el xefe de gabinete, el xefe de comunicación axuntu… The West Wing, ensin cayer no naif, amuésanos un llau más amable y, sobre too, idealista de la política. Un llau que nel mundu real cuéstanos cada vez más velu pero que, ¿Por qué non? La ficción nun dexa de ser suañar y bien guapo ye facelo con unes instituciones más llimpies y unos políticos más idealistes y menos maquiavélicos de los que tenemos. Quiciabes una de les primeres series de política y, ensin duldes, la más importante de la so dómina.
