De xuru que vos suena’l nome de She-ra, o a lo meyor el del so hermanu mellizu He-man: dambes series entamaron a emitise nos 80 y tuvieron un ésitu ablucante, con una montonera de xuguetes venceyaos a dambes sagues (como’l bien conocíu castiellu de Greyskull).
Güei nun vamos falar de la serie de los 80: vamos falar de la versión que Dreamworks fexo en collaboración con Netflix y Mattel y qu’asoleyó la so primer temporada en 2018. Una versión nueva, con una revisión nos personaxes clásicos y nel guión que bien se pue considerar una de les meyores series de dibuxos infantiles (y apta al empar pa no tan neños y neñes) de la segunda década de los 2000.
La serie ta protagonizada por Adora, una güérfana criada con otres neñes pola Horda y entrenada militarmente pa finar colos últimos rescoldos de la resistencia d’Etheria. Ye ellí onde un día s’atopa con una espada máxica (La espada de Protección) que-y da’l poder de tresformase en She-ra (una de les princeses de poder) y onde se decata que La Horda nun ta faciendo bien nengún y marcha a la resistencia, renunciando a quien pensaba que yera y a tola so “familia” adoptiva, incluyía la so meyor amiga Catra.
Durante les cinco temporaes vamos descubriendo qué rellación tien Adora con She-ra y la espada y coles princeses de poder y quién ye ella en realidá, cómo polo qu’ella considera lo correuto tien que renunciar a muncho y poco a poco conociendo l’universu del que vien La Horda y los sos crímenes. Por cierto, nesta versión nun se menta a He-man, ye una serie independiente (tamién de la versión nueva de Masters of Universe, de la que nos faló’l caberu mes Adrián Carbayales).
La serie ta dirixida por Noelle Stevenson, ganadora del premiu Eisner del Cómic pola so obra Nimona. Ye tamién coautora na saga Lumberjanes y Runaways. La mano de Stevenson amuésase na inclusividá nos personaxes y na propia historia, asina como na diversidá física d’ellos.
Ún de los enfotos de la serie nueva ye ufrir unos personaxes físicamente más diversos y menos homoxéneos: si vos alcordáis de la orixinal, toles moces taben feches con un físicu estándar. Nesta versión nueva atopamos diversidá nos cuerpos y tamién nos tonos de piel. Ye más, fuxe de la sexualización de los personaxes (nun podemos escaecer que ye una serie dirixía a un públicu infantil), que van vistíos con una ropa más acordies pa lluchar. Amás, tamién podemos atopar una bona representación de la comunidá LGTBIQ (pero nun vamos facer spoilers).
Como con too, hubo xente a la que nun-y prestó’l cambiu de diseñu de dellos personaxes (y de la historia) en comparanza cola serie orixinal . Como rempuesta a esto, paez que ye xente que quedó anclada na década y la forma de ver les series y que nun comprenden que yá tienen la primer versión d’esa mena.
Si vos presta la serie, esti branu vais tener la oportunidá de conocer y escuchar a Noelle Stevenson, que yá foi anunciada como una de les invitaes del Celsius 232, que se fai n’Avilés ente’l 19 y 23 de xunetu.
