Na presentación diaria en redes de los actos que van facer parte de l’AsturCon (alcuentru de fantasía asturiana, que se celebra los díes 2 y 3 d’avientu nel Antiguu Institutu Xovellanos, Xixón), la organización anunció ayeri la mesa Robando personaxes, na qu’autores de pastixes o reinterpretaciones de personaxes clásicos van falar sobre cómo abordar xera tala p’aprovechar bien “los xuguetes” d’otros.
Ente los participantes alcuéntrase’l nomáu y prolíficu Rodolfo Martínez, ganador d’un Minotauro y conocíu, ente otres coses, polos sos pastixes de Sherlock Holmes y Conan el Bárbaru. Tamién va participar Helena Seoane, autora que nes sos dos obres (La otra cara de Morgana y Morgana, la otra discípula de la diosa) da una vuelta de tuerca a los personaxes artúricos. Y zarra la mesa Franco Torre, qu’ente les sos obres tien dos novelines d’a duru (La liga de los teclistas barbudos y El presunto emperador de Manchuria) nes que pon a Sherlock Holmes en situaciones que xueguen colos tópicos.
La mesa va tar moderada por Adrián Carbayales, ún de los organizadores de l’AsturCon y que, amás, ye autor d’otru pastixe qu’axunta y enfrenta dos clásicos: la polémica novela n’asturianu La Rexenta contra Drácula.
