Los universos compartíos esisten nel cine amuchayá, dende aquelles películes clásiques qu’empezaron a mecer los monstruos d’Universal. Por embargu, nun foi hasta la llegada de les de Marvel qu’empezaron a facese habituales, y agora tenemos tamién l’universu de DC, el “Monsterversu” de King Kong y Godzilla, o’l de les ponderes de The Conjuring, por mentar namás unos cuantos. Y como ye un componente tan comercial, que permite sacar una película col hype yá consiguíu poles anteriores, ta claro que llegó al cine americanu pa quedar.
Mattel, la compaña productora de xuguetes, nun quier quedar al marxe d’esto, y como tien bien de franquicies qu’esplotar yá ta faciendo cábales al respeutive. Barbie sedría, asina, l’ariete col que pretenden entrar nel mundu de les franquicies cinematográfiques, y delles fontes cuenten que si la película tien ésitu tán pensando… ¡n’otres cuarenta y cinco! Bono, nel plan a plazu curtiu tienen trece, pero yá tienen bocetaes toes eses.
Una d’elles ye, como nun podía ser d’otra manera, He-Man and the Masters of the Universe, el clásicu de los dibuxos y moñecos ochenteros que va poco revilvó Kevin Smith nuna serie de Netflix, y del que yá se tien falao sobre facer una película nueva. Y ye que dende la de Dolph Lundgren yá llovió, y la so fusión de fantasía y ciencia-ficción, al más puru estilu de Jack Kirby tien un potencial increyible coles téuniques nueves d’efeutos especiales que tienen apaecío dende aquella.
Otru proyeutu que taría yá avanzáu sedría’l de Polly Pocket, que si nun vos suena sedría una especie de Pinypon con caxines qu’al abriles tienen cuartos y casuques. Va unos años qu’hai una serie de dibuxos d’ello, y l’argumentu que-y dieron ye que les rapacines protagonistes puen apequeñar al usar unos relicarios máxicos.
Tamién taríen tresnando una película de Hot Wheels, los cochecinos de carreres, colo que podemos imaxinar una especie de Fast & Furious pa tolos públicos. Polo que cuenten, taría dirixida nada menos que por J. J. Abrams (el de les últimes triloxíes de Star Wars y Star Trek). Otra, Rock’Em Sock’Em Robots, taría basada naquel xuguete que, si recordáis, yera un ring de boxéu con dos robós que s’iguaben les costielles, y esta protagonizaríala Vin Diesel. Tamién habría una d’humor negru basada na Bola 8, el xuguete aquel que cuando lu xiringabes predicía’l futuru. Y una del moñecu de los sesenta Major Matt Mason, una especie d’Action Man del espaciu, que protagonizaría Tom Hanks.
Como veis, Mattel apunta alto. Y too depende del ésitu de Barbie. Estrénase, a estes, el ventiún de xunetu.
