Tres d’anular les películes de Man of Steel 2 y Wonder Woman 3, la direición nueva de James Gunn sigue pegando tayos al debaláu universu cinematográficu DC. Per un llau, Dwayne Johnson confirma que nun hai planes pa que Black Adam vuelva (menos tovía cola perda de millones que supunxo y los rumores de que l’actor espardió información falsa a sabiendes pa que la película paeciere un ésitu). Per otru, paez ser que pa rematar les versiones de Superman y Wonder Woman de Henry Cavill y Gal Gadot, tiense ordenao recortar los cameos que diben tener n’Aquaman and the Lost Kingdom y The Flash. Esta última, envuelta na polémica polos escándalos d’Ezra Miller, paez siguir alantre (¿quiciabes pa facer un Flashpoint que cambie la continuidá?), y de momentu tampoco paez haber problemes con Blue Beetle (que nun tien pinta de tar mui coneutada a les demás), The Batman 2 (fuera de la continuidá DC actual, y pueque dientro de la futura) o Joker: Folie à Deux (que va dafechu a lo suyo).
Al respeutive de les crítiques que tán cayéndo-yos polos cambeos, Gunn respuende que “les miagaes irrespetoses d’una minoría” nun van consiguir nada porque ellos van facer lo que piensen que ye meyor pa la franquicia. Amás, ta dando pistes nes redes de que tienen planes pa personaxes menos conocíos del universu, como puen ser Lobo o Mister Terrific.
