Sims 4: ¿Qué camuda? – una guía d’Aymara González

Ye oficial: tamos confinaos, polo menos, fasta finales d’abril. Nin clases presenciales, nin salir a trabayar… Una situación tala como la que tamos esperimentando por mor del COVID-19 ye, cuantu menos, esmolecedora. Nun tamos avezaos a tener tantu tiempu llibre. Asina que… ¿Por qué nun recuperar vieyos vicios gamers?

Munchos crecimos xugando a la saga Sims; yo, especialmente, colos Sims 2. Asina que, cuando vi que taba la cabera versión a un preciu tán baxu (8,99 € la edición básica n’ Instant Gaming y 12,48 € la Digital deluxe n’Origin), púnxime a descargalo. Agora que llevo unes selmanes xugaes, pienso davos una ristra motivos pa que vosotros tamién vos viciéis darréu, con toles meyores respeutu a les otres ediciones:

Edición de personaxes: la personalización del Sim ye un carambelín. Onde enantes topábemos milenta comandos p’allargar ñarres, agrandar güeyos y poner cazu, agora too ye per intuitivo. Dende l’entamu podemos güeyar grandes meyores; hai una gran diversidá de tonos de piel y pelu, inclusive de fantasía; hai tatuaxes y pendientes; tenemos munches etnies preconfiguraes que tomar como base; morfoloxía corporal variao… Amás, tola fisonomía pue camudase col punteru, arrastrando o acurtiando como mos pete, y podemos escoyer fasta la voz y la forma d’andar.
- Puntu positivu: la sicoloxía. En vede calcar un signu del horóscopu y una filera d’aspiraciones (toes mui conservadores), como nos Sims 2 y 3, agora podemos escoyer categoríes y rasgos principales y secundarios pa dá-y más complexidá al asuntu. Tamién tenemos la opción, si nos da vagame, de rellenalo con un test d’entrugues cencielles, pa que’l resultáu seya realista.
- Puntu negativu: edición incompleto. Dexen fuera rasgos aparentemente simplayos colos que podría ser total y perfecha, como l’altor. Aparte d’eso, hai muncha menos ropa de partida comparao con otres ediciones, que tenemos de descargar dende la comunidá en llinia o ampliar coles espansiones y paquetes de xuegu.
Mou construyir: pa los que siempres quinxeron facese la casa pero nun queríen echar munchu nello, la cuarta edición soluciona’l problema. Agora podemos facer una casa dende 0 colos cuartos predeterminaos, que podemos agrandar o non y nos que tamién podemos camudar la distribución. Tamién tenemos integráu el mou comprar d’otres ediciones, onde tamién podemos topar novedaes: agora hai oxetos de premiu y de profesión mui destremaos, pa motivar el desendolcu vital del nuesu Sim.
- Puntu positivu: la variedá coherente d’edición. Podemos escoyer l’altor de les paredes; hai muncha más variedá de muebles, los estilos tan más coordinaos ente sí; munchos más instrumentos musicales y de destremaes calidaes…
- Puntu negativu: el sistema tien una entrada complicada. Nes tres primeres ediciones calteníen munchu más les referencies visuales; agora, optaren por agrupalo pa facelo más fácil… Pero cuesta facese al entamu.
Mou vida: ¿alcordeisvos de cuando queríemos dir al parque y había que montar pocu más o menos qu’una espedición al Amazones? Eso, agora, soluciónase: los nuesos Sims pueden salir a correr alrodiu casa y dir a dar un paseu ensin complicase demasiao. Aparte, hai un mayor rangu d’emociones y les rellaciones son más complexes porque hai munches formes d’intentar facer collacios. Hai nueves profesiones, como la d’influencers (sí, por desgracia eso tamién tenía qu’aportar equí), y en vede tener que tirar del teléfonu de casa o mercar un móvil, agora tenemos un smartphone integráu nel panel del Sim. Amás, los personaxes pueden facer varies coses a la vegada,como ver la tele y xintar al empar.
- Puntu positivu: los paneles plegables. Podemos abrir o zarrar los paneles de necesidaes, inquietúes, simoloxía, etc. sigún mos pete. ¿Qué queremos tener más campu visual? Pues podemos quitar d’en mediu los indicadores.
- Puntu negativu: puedes metete n’enguedeyos gordos ensin querelo. A mayor complexidá, mayor escala de grises; yá nun hai pasos predeterminaos que siguir pa emparellase con daquién o facer collacios.

Nun podemos rematar l’artículu ensin destacar la comunidá Sim integrada nos paneles del xuegu. Agora ye muncho más cenciello descargar y compartir personaxes (anónimos o de famosos) amás de creaciones propies, cuando n’otres ediciones teníemos que bucear selmanes nos foros del xuegu, descargar, meter nel xuegu, reiniciar…