¿Sabíes qu’hai un simulador de cabres? ¿Y ún de ser xateru? ¿Sabíes qu’hai un xuegu nel que pues ser un mosquitu y dir picando a la xente? Éstos son quicibes los más conocíos de too, pero la verdá ye qu’hai bien de videoxuegos enforma raros nel mercáu.
Anque tamos avezaos a les etiquetes “estratexa”, “simulador”, “shooter”, “RPG”, “Arcade”, “indi”… ehí fuera hai bien de xuegos que nun s’adauten a lo que tamos avezaos a considerar “normal”. Esto pue debese a les temátiques, al fechu de que pensáronlos y fixéronlos como burlles o por ser una apuesta pola innovación. Nesti artículu facemos un repasín de los videoxuegos más alloriaos de toos.
Goat Simulator: El simulador de cabres que puchen a la xente
Goat Simulator, lliteralmente “Cabra Simulator” ye un simulador nel que’l xugador xuega como una cabra. ¿Y qué fai una cabra amás de pacer y dormir? entrugaréisvos. Lo cierto ye que nel Goat Simulator lo que fai ye “molestar” o, meyor dicho, “puchar”. El sistema ye cenciellu y absurdu, pero los fans del Goat Simulator cuéntense por millones
Genital Gousting: El xuegu de ser una xorra y afuracar culos
Sí. Lleistis bien. El Genital Goustling ye un xuegu que va de ser una xorra como aquélles que pinten los neños de pequeños nos baños del colexu y nes meses de clas. La xorra en cuestión tien dos testículos y una abertura que paez ser el culu. L’oxetivu del xuegu nun queda mui claru, pero a xulgar polos gameplays paez que ye’l de metese n’otres xorres y xugar a lo que paez ser un partíu de fútbol.
Fluffy Horde: coneyos asesinos qu’invaden la to ciudá
Fluffy Horde ye esautamente lo qu’indica’l títulu: Una horda de coneyos que paecen tan guapos y simpáticos como cualquier otru coneyu, pero que son igual que’l de los Montty Python: Dañinos y asesinos. Nesti xuegu l’oxetivu ye cenciellu: tenéis que vos defender de la horda de coneyos asesinos que van venir a pola vuesa ciudá o pueblu. Nun dexa de ser un romper cola tradición de pintar monstruos horribles, pero ye enforma llamativo.
Una de les coses que más llamen l’atención del xuegu, ye’l ver que de xemes en cuando apruz un home vistíu de cenahoria que tien como oxetivu’l de distrayelos pa poder ganar tiempu. ¿Y paecíenvos rares les xorres?
Mister mosquito: El branu pasáu, vistu colos güeyos d’esi mosquitu que nun te dexó dormir
Mister Mosquito yá tien unos añinos, pero nun dexa de siguir mereciendo tar nel nuesu top de la rareza. Nesti xuegu, con unos gráficos que recuerden a lo que solíemos ver na PlayStation 1, el xugador ponse nel pelleyu d’un mosquitu (¿o deberíemos dicir exo-cadarma?) y tenemos que dir picando equí y ellí a la xente de la casa. Les pantalles o niveles, suelen correspondese coles estremaes partes nes que se dixebra la casa y les amenaces y maneres d’escapar son estremaes. Amás de picar y beber el sangre, tenemos que saber salir pitando a tiempu. ¡Nun ye fácil!
LSD Dream Emulator: Les drogues son males, pero esti xuegu casi ye peor
¡Qué males son les drogues! Sabémoslo yá toos… por eso debió ser qu’hebo a quien se-y ocurrió facer un xuegu nel que poder esplorar los efeutos interesantes que mos dan les drogues ensin tener que perder neurones y arriesgar la vida pel camín. Equí, la única sobredósis va ser la de malos gráficos. Supónse que’l xuegu mos llevaría a ver lo que sedría’l “suañu” d’una persona que ta baxo los efeutos del LSD. Lo cierto ye que’l xuegu acaba dexándonos col sentimientu de que si eso son les drogues, val más nun les probar.
Bonus track: El xuegu de DIOS
Tovía nun ye una realidá, pero sí ye un proyeutu que convién siguir de cerca. “I am Jesus Christ” (Soi Xesucristo) ye un videoxuegu que mos pon nel pelleyu del personaxe históricu y supuestu “fíu de Dios” que deberá dir faciendo milagros per dayuri. El problema que tien ye que yá mos fixeron tolos spoilers. Y ye que, como diz un internauta, el manual del xuegu o “Walkthrough” pa ser Xesucristu lleva asoleyáu unos cuantos sieglos.
