Por Adrián Carbayales
La verdá que principia un poco apurao. Entovía nun-y avagó presentar les trés protagonistes y yá anden fuxendo a tou meter. Nun te preocupar, yá habrá tiempu de dir p’atrás. Ye que los episodios son de ventipicu minutos, y el primeru ha d’amosar lo que nos espera. Bono, ¿y qué ye lo que nos espera?
Pos la serie acabante estrenar, que ye de los mesmos creadores qu’El embarcadero (tamién, per separtao, de La casa de papel o Vis a vis), trata de trés prostitutes, forciaes a ello en graos estremaos, qu’han de fuxir del club que les esplota porque s’engarrien col proxeneta (un castrón que ye más malu que’l pecáu) y col encaloramientu, pa salvar les amigues, una arreviénta-y el craniu. Ehí escomienza l’aición corrida, una road movie pel ermu Tenerife que rezume cine a ternu y ambo. Bien podría ser una obra de Tarantino: protagonistes de moral turbia, malos qu’anque siendo de lo más despreciables (y un poco fatos) nun pues evitar que te cayan simpáticos, escorridielles en coche, tiros, carreres pel sable pa salvar la vida, una banda sonora escoyida esquisitamente pa que perdiga coles escenes y la sensación de qu’hai munches más referencies a películes de les que fuisti a sacar, anque seyan unes cuantes.
Pero tampoco nun vamos atopar estética ensin más, una hestoria que pa entretener faga xirigates de daqué tan serio como la trata de blanques. La verdá qu’al lleer crítiques d’esa mena, y ver que nun son nin una nin dos, quedé ablucáu. ¿Qué ye, que fai xirigatesLa vita è bella de les víctimes de los nazis?Ye verdá que Sky Rojo tien un humor negro tremendo, pero per aciu d’él amuésanos realidaes terribles de la prostitución. Danos demasiaos detalles, detalles que probablemente nun se te pasaron nunca pela cabeza, y que de xuru quies más nun saber. Por embargu, al pasánoslos pel focicu, con puñalaes que nos meten cuando tamos cola guardia más baxa y nos lleguen fasta les coraes, faennos respigar cuando va un cachín tábemos riendo y fuérciennos a cavilgar sobre los horrores d’aquella vida. Al contrario de lo que dicen tales crítiques, pa les que paez qu’hai temes que ye meyor nun tocar, la manera como trata l’asuntu pue consiguir precisamente que nos concienciemos, y en resultancia facer del mundu un llugar meyor.
Pero tampoco nun vamos ponenos mui trescendentales. El fondu ye bultable, y si fai falta mentalo equí ye pola rempuesta, pa mio idea sorprendente, que se dio dende un bon númberu de medios de comunicación. El casu ye que tamos énte una bona serie d’aición, de comedia, de drama… Nos últimos años, les bones obres tán acullá de poder asitiales en cualesquier xéneru. Ye arte construyío sobre arte, una serie lliviana y al empar con una fuercia bárbara, que ye lo que ye gracies a dir a carrapuchu de xigantes.
